فیصل شہزاد چغتائی : انبیاء دی زمین ملک شام تے اجڑے ہووے گھر ، خون دے آنسو راؤئی ویندن، کھینڈے ہووے انسانی جسم دے حصے، زندہ لاشاں بنڑیاں ماواں ، ٹوٹے ہووے جسم سسکدے ہووے پیو ، چیخدیاں شور مچیندیاں بھینڑیاں ، تڑپدے ہووے انہاں دے بھیرا امت مسلمہ دی مجرمانہ خاموشی تے سراپا احتجاج نظر آندن، سوشل میڈیا تے ڊل ہلا ڈیون والے معصوم بالاں دے روندے ہووے زخماں نال چور بالاں دی فریاد ، انہاں دا تکلیف تے روݨ مسلماناں دے ضمیر کوں جھنجوڑن اچ ھن تک ناکام نظر آندے، ملک شام دے اپریل 1946 اچ فرانسیسی سامراج توں نام نہاد آزادی حاصل تھیوݨ دے بعد وی ایں ملک دے معاملات کئی سالہاں تک ایں سامراج دی نگرانی اچ رھے، حافظ الاسد 1964 اچ شام دی فضائیہ دے کمانڈر دے عہدے تے فائز تھئے ، 1967 اچ خانہ جنگی دے دوران وزیر دفاع منتخب تھئے ، 1970 اچ حافظ الاسد نے حکومت دی باگ دوڑ سنبھالی تے ریفرینڈم دے ذریعے شام دے صدر دے عہدے تے پھج گئے شام تے 21 سال تک حکومت رھاون دے بعد جون 2000 اچ ھارٹ اٹیک نال وفات پا گئے تاں انہاں دے پتر بشار الاسد 10 جولائی 2000 کوں ملک دے نویں صدر بنڑے، 2007 اچ ڈوجہی واری صدر تے 3 جون 2014 کوں تیسری واری صدر منتخب تھئے ملک شام اچ شروع توں ھی طاقت دی دوڑ رھی ھِ جئیں ویلے ایران نے 2006 اچ شام دے نال سفارتی تعلقات کوں ودھاون شروع کیتا ۔ تاں کئی ڈوجہے ملکاں نی وی دلچسپی گھنݨ شروع کر ݙیتی جیندے اچ امریکہ ، روس، سعودی عرب ، قطر قابل ذکر ھن۔ اسرائیل تاں پلے توں دخل اندازی کریندا آندا پیا ھا ، انہاں ممالک نے اپنڑیں اپنڑیں مفاد کو سامنڑیں رکھیندے ہووے شام اچ سرگرم مختلف باغیاں تے دہشت گرد گروپاں جیندے اچ داعش ، گرداں دا گروپ ، جمہوریت دے حامی باغی گروپ کوں مزید ہوا ڈیون شروع کر ݙیتا ، 19 مئی 2011 کوں امریکی صدر پارک اوبامہ نے شام اچ ھک نویں جنگ دا آغاز کیتا۔ جیندے نتیجے اچ حکومت مخالف مظاہرے تے خانہ جنگی شروع تھئی جیکوں صدر بشار الاسد نے حکمت عملی دی بجائے فوجی طاقت نال نمٹن دا فیصلہ کیتا ۔ کجھ مسلمان ممالک تے عالمی طاقتاں دی مداخلت دی صورت اچ وی ھن تک شام اندرونی انتشار دا شکار ھِ
شام اچ 5 لکھ دے نیڑے لوگ شہید تھئی چکے ھن 10 لکھ دے قریب زخمی ھن 48 لکھ افراد ہجرت کر کے لیبنان ، رقی ، اردن تے کجھ دیگر ملکاں اچ ھجرت کر چکے ھن 70 لکھ دے قریب اندرون ملک بے گھر ھن 10 لکھ دے قریب لوگاں یورپ دے ممالک اچ پناہ کیتے درخواست ڈے چکے ھن ۔ شام اچ انسانیت دی تذلیل تے اقوام متحدہ تے دیگر ممالک دے نال نال پاکستان کوں اپنڑاں کردار ادا کرنا ہوسی۔ بمباری دا شکار تھیون والے لوگاں دی طبی امداد تے غذائی امداد دی فوری ضرورت ھِ اگر اساں شام اچ ویلفیئر دے جذبے نال امداد دی صورتحال ڈیکھوں تاں اقوام متحدہ تے منہاج ویلفیئر فاونڈیشن دے علاوہ کہیں تنظیم یا ملک دی طرفوں کوئی اقدام نظر نی آندا، سال 2011 اچ وی اقوام متحدہ تے منہاج ویلفیئر دی طرفوں شام دے لوگاں دی مدد کیتی گئی ھائی تے ھن فروری 2018 اچ تھیون والی حالیہ دارالحکومت دمشق دے قریبی علاقہ غوطہ اچ تھیون والی بمباری دی صورتحال اچ یورپی ممالک تے منہاج ویلفیئر فاونڈیشن دی طرفوں ڈاکٹر طاہر القادری نے شام اچ فوری طور تے جنگ بندی دا مطالبہ کتیا تاکہ بے گھر تے متاثرہ لوگاں تک امدادی سامان پھجایا ونج سکے۔ ڈاکٹر طاہر القادری دے حکم تے منہاج ویلفیئر فاونڈیشن دی طرفوں ونجن والی ابتدائی امدادی ٹیم سامن گھن تے شام دی متاظرہ عام تک پھج چکی ھِ پاکستان کاں اپنڑاں سفارتی کردار ادا کریندے ہووے شام دے مسلماناں دی ایں بد حالی اچ امداد کوں یقینی بنڑاون دی لوڑ ھِ شام اچ دخل اندازی کرن والے ممالک توں پاکستان کوں ملکی سطح تے گالھ کرنی چاھیدی ھِ ایں خانہ جنگی اچ عوام دی حفاظت کوں ہر صورت یقینی بنڑاون تے زور ڈیونڑاں ہوسی انسانیت دے ایں قتل عام کو بند کرواون کیتے زور ڈیونڑاں ہوسی ۔ شامی مسلماناں دی میڈیکل تے غذائی امداد کیتے پاکستان تے ملک توں ملک بھر دیاں ویلفیئر تنظیماں دے تعاون تے حکومتی سطح تے شامی مسلماناں دے ریلیف کیتے قابل ذکر اقدام کرنے چاھیدے ھن۔ اے لمحہ فکریہ ھِ کہ ھک ملک اچ اتنی کثیر تعداد اچ مسلماناں دا کھلے عام قتل تھیندا پئے تے پوری مسلم امہ بہہ تے تماشہ ڈیکھدی بیٹھی ھِ امت تاں امیت تمام انسانیت دیاں حامی آرگنائزیشناں ادارے چپ کر تے بیٹھن اج کوئی انسانیت دی خاطر آواز بلند کرݨ دی ہمت نی کریندا تے نا ھی کوئی مردے معصوم بالاں دی ماواں کوں حوصلہ ڈیندے۔ شام دے مسلماں شہدا کیتے دعا کریندے ھیں تے اللہ پاک ایں مشکل وقت اچ انہاں دے واسطے مدد عنائیت فرماوے تے مسلم امہ کوں ایں بارے الاون دی ھدایت ڈیووے۔ اے سر زمین انبیاء کرام دی ھِ ایتھاں زیارتاں ھن اولیاء کرام دی زمین ھِ ایں مقدس زمین تے ظلم دے انتہا تھئی چکی ھِ تے اساں سبھ بطور مسلمان ہوون دے خاموش ھیں ، مسلم ممالک دی خاموشی ھک افسوس ناک سوالیہ نشان ھِ جو ہر ضمیر رکھن والے توں ھِ ۔
Leave a Reply