جلال پورتحصیل ہیڈ کوارٹر ہسپتال اچ ڈیوٹی سرانجام نہ ڈیونڑ آلے ڈاکٹر عملے دے خلاف کاروائی کیتی ویسی ، اسسٹنٹ کمشنر
جلال پور پیر والہ۔ ہفتے دے ڈینھ اسسٹنٹ کمشنر غلام سرورتحصیل ہیڈ کوارٹر ہسپتال پج تے ہسپتال دے مسلیں دے حوالے نال ہک اجلاس اچ شرکت کیتی ۔ اجلاس اچ ہسپتال دے ایم ایس ڈاکٹر احسان باری، ہسپتال اچ تعینات ڈاکٹرز اتے ڈپٹی ڈسٹرکٹ ہیلتھ آفیسر ڈاکٹر مبشر جلال شرکت کیتی، اجلاس دے بعد اسسٹنٹ کمشنر غلام سرور صحافیاں کوں ڈسائے جو گزریل ڈینھ میں سوشل میڈیا دے ذریعے ہسپتال اچ ڈاکٹرز دی عدم دستیابی ااتے علاج نہ کرنڑ دیاں شکایتاں سامنڑے آئیاں ہن اجلاس اچ طے پاتے جو ٹی ایچ کیو دے گھوسٹ ملازمین بشمول لیڈی ڈاکٹرز جیرھے جو اپنڑے پیشہ ورانہ فرائض ادا کیتے بغیر ہسپتال توں تنخواہ گھندے پئن انہاں دے خلاف کاروائی کیتی ویسی ۔ ہسپتال اچ ڈاکٹرز دیاں 60فیصد آسامیاں خالی ہن تے ہسپتال دے معاملات اچ بہتری کیتے وختی مزید 6توں ست مرد تے تریمت ڈاکٹرز دی ضرورت اے ۔چیف ایگزیکٹو آفیسر ہیلتھ اتے ڈپٹی کمشنر ملتان کوں سفارش کیتی ویندی پئی اے انہاں دی وختی تعیناتی کرائی ونجے تے مقامی رہائشی ڈاکٹرز کوں ترجیح ڈتی ونجے ۔ اے پی پی
