ملتان ۔ معروف سرائیکی محقق ، دانشور پروفیسر شوکت مغل انتقال کر گئے انہاں دی عمر ٧٣ سال ھائی تے او کجھ ݙینھ توں بہوں بیمار ھن، بلاشبہ سرائیکی لغت تے لسانیت دے حوالے نال ایں خطے ءچ سبھ توں زیادہ کم پروفیسر شوکت مغل نے ھی کیتے ۔
شوکت مغل ٤ جون ١٩٤٧ کوں ملتان دے علاقے پاک گیٹ ءچ پیدا تھئے ۔ انہاں دے پیو دا ناں حسین بخش ھا ، شوکت مغل نے میٹرک ملت ھائی سکول کچہری روڈ توں ١٩٦٣ ءچ کیتی ، ١٩٦٥ ءچ گورنمنٹ ایمرسن کالج توں ایف اے تے ١٩٦٧ ءچ ایں کالج توں گریجویشن کیتی ۔ علوم اسلامیہ ءچ ایم اے دا امتحان ١٩٦٩ ء ءچ پنجاب یونیورسٹی توں پاس کیتا، ١٩٧١ء ءچ ای اے اردو کیتا۔ ایں توں پہل ١٩٦٨ء ءچ ھی او بی ایڈ کرݨ دے بعد شعبہ تدریس نال منسلک تھئی چکے ھن ، ١٩٧٥ تک انہاں سکول ءچ تعلیم ݙیتی جیندے بعد او لیکچرار دے طور تے انہاں دی کالج ءچ تقرری تھئی گئی ۔
١٩٧٥ توں ٢٠٠٧ء تک او کالج ءچ اردو پڑھیندے رہے تے نال نال تحقیقی کم وی جاری رکھا۔ شعر و ادب دے نال وابستگی کالج دے زمانوں توں ھی ھائی ، پروفیسر شوکت مغل دی مختلف موضوعات تے اردو تے سرائیکی ءچ ٥٦ کتاباں چھپیاں، سرائیکی لغت ، سرائیکی لسانیات ، سرائیکی محاوریاں تے ضرب المثل تے انہاں دی کتاباں خاص طور تے قابل ذکر ھن ۔ انہاں دی کتاباں ءچ ملتان دا سرسید ، مرزا مسرت بیگ ، قدیم اردو لغت تے سرائیکی زبان ، سرائیکی قعدہ ، اردو ءچ سرائیکی زبان دے انمٹ نقوش ، سرائیکی آکھان (تریھ جلداں) سرائیکی محاوے (ݙو جلداں) ، سرائیکی مصادر (ھک جلد)، سرائیکی زبان ءچ کنایہ تے قرینہ ، قدیم سرائیکی اردو لغت ، شوکت اللغات تے اصلاحات پیشہ وارانہ قابل ذکر ھن، انہاں آکھیا کہ لغت دے حوالے نال مختلف کتاباں دے ترجمے وی کیتے ۔
سرائیکی سفر نامیاں ءچ دلی ڈھائی کوہ ، ملتان توںپٹیالے تئیں تے دیگر کتب ءچ الف بے بٹوہ ، کنائی ، افادات تے پچھیرا شامل ھن ۔ شوکت مغل کوں انہاں دی متعدد کتب تے مختلف اعزازات نال نوازا گئیا۔
پروفیسر شوکت مغل بیماری دی جنگ لڑدے لڑدے اج اپنڑیں خالق حقیقی نال ونج ملے اور عرصہ دراز توں بیمار ھن تے ݙینھ توں کافی طبعیت خراب تھیوݨ نال جھوک کوں خیرباد آکھ گئے۔ انہاں دیاں وسیب نال محبتاں تے خدمات کوں صدیاں تک یاد رکھا ویسی۔
