ملتان (اے پی پی):مینگو سٹی ملتان اچ زرعی یونیورسٹی دے اہتمام نال امبیں دا پنجواں سالانہ میلہ منڳل دے ݙینھ مک ڳیا ۔ میلے وچ امب دیاں 300 ورائٹیاں دے سٹالز اچ شہریاں وݙی دلچسپی ݙکھائی ۔ ایں موقع تے خصوصی تقریب منعقد تھئی جیں اچ زرعی یونیورسٹی ملتان دے وائس چانسلرپروفیسر ڈاکٹر آصف علی سودھے اہم شخصیات شرکت کیتی۔ڈاکٹر آصف علی’’ اے پی پی ‘‘نال ڳالھ مہاڑ کریندے ہوئیں آکھیے زرعی یونیورسٹی جتھاں زراعت دے شعبے اچ تحقیق کوں ودھارا ݙیندی پئی اے اتھاں ایں قسم دیاں نمائشاں دے ذریعے وی آگاہی ݙیندے پیوں ، ہݨ امباں دا میلہ ملتان دی سنڄاݨ بݨ ڳئے۔انہاں ݙسائے میلے اچ سندھ تے پنجاب سودے پورے ملک توں 50کاشتکاراں شرکت کیتی۔ فیسٹیول اچ روٹی ٹکر دی تیاری دے مقابلے تے میوزیکل شو توں علاوہ مینگو مشاعرہ وی منعقد تھئے جیں اچ سلمان گیلانی سودھے مختلف مزاحیہ شعراء اپݨا کلام پیش کیتے۔میلے دے چھیکڑی ݙینھ لوکاں دی وݙی تعداد میلے اچ شرکت کیتی۔ مینگوفیسٹیول اچ امب دے سٹالز توں انڄ امب توں تیار مربے، چٹݨیاں تے روٹی ٹکر دے سٹال وی لاتے ڳئے ، لوکاں سندھڑی ،دسہری،چونسہ ،انوررٹول، لنگڑا ،شوگر فری مینگو دے علاوہ ایہو سویں ورائٹیاں اچ وی دلچسپی ڳھدی جیں تے حالی تجربے تھیندے پئن تے جنہاں دی حالی تئیں باقاعدہ پیداوار شروع نئیں تھئی ۔