پاکستان سٹیل ملز کیس اچ وزارت صنعت و پیداوار جواب سپریم کورٹ اچ جمع کراڈتے
اسلام آباد. پاکستان سٹیل ملز کیس اچ وزارت صنعت و پیداوار اپنڑاں جواب سپریم کورٹ اچ جمع کروا ڈتے ۔ منگل کوں عدالت عظمیٰ اچ وزارت صنعت و پیداوار ولوں جمع کرائے گئے جواب وچ ڈسایا گئے جو پاکستان سٹیل ملز کوں چلاونڑ کیتے 5 بیل آوٹ پیکیجز ڈتے گئن ، مالی سال 2008-09ءتوں گھن تے ہنڑ تئیں پاکستان سٹیل ملز کوں 58 ارب ڈتے گئن ، سوئی گیس بلز دی مد اچ ملز دے ذمہ 22 ارب روپے واجب الادا ہن۔ وزارت صنعت و پیداوار ولوں جمع کرائے گے جواب اچ ڈسایا گئے جو اقتصادی رابطہ کمیٹی (ای سی سی ) جنوری 2020 ءکوں سوئی سدرن کوں پاکستان سٹیل ملز دی گیس منقطع نہ کرنڑ دی سفارش کیتی، نیشنل بنک آف پاکستان وی پاکستان سٹیل ملز کوں 36 ارب توں ودھ دا قرضہ ڈتا ۔
نیشنل بینک آف پاکستان کوں قرضہ حالی وی کائنی ڈتا گیا ۔ وزارت صنعت و پیداوار دے جواب اچ مزید ڈسایا گئے جو پاکستان اسٹیل ملز جون 2015ءاچ اپنڑاں کمرشل آپریشن بند کیتے، کمرشل آپریشن بند کریندے ویلھے اسٹیل ملز دے 14 ہزار 753 ملازمین بارے کوئی پلان نی بنڑایا گیا ،2019ءاچ پاکستان سٹیل ملز ملازمین دی تعداد گھٹ توں گھٹ 8 ہزار 884 تئیں رہ گی اے ، اسٹیل ملز ملازمین دی ماہانہ تنخواہیں دی مد اچ حکومت 335 ملین ادا کریندی رہی اے ،حکومت پاکستان تنخواہیں دی مد اچ ہنڑ تئیں 34 ارب روپے جاری کر چکی اے جڈاں جو 1.26 ارب روپے فوت تھیونڑ آلے ملازمین دی فیملیز کوں ڈتے گئن ، 2018ءاچ ماہرین تے مشتمل کمیٹی ملز کوں پبلک پرائیوٹ پاٹنرشپ دے تحت چلاونڑ دی سفارش کیتی ، نجکاری کیتے فنانشل ایڈوائزر دی تقرری کیتی گئی اے ، ملازمین کوں تنخواہیں تے بقایا جات دی ادائیگی سپریم کورٹ دے فیصلے دی روشنی اچ کیتی ویسی ، پاکستان سٹیل ملز انتطامیہ ولوں ادائیگی دا پلان حتمی ہوسی۔ اے پی پی
