سیاسی پیر زرداری نے سینٹ تے بلوچستان اچ جوڑ توڑ دا بیڑا چا گھیدا
کراچی(سرائیکی نیوز) سابق صدر آصف زرداری سینیٹ الیکشن دے حوالے نال سیاسی جوڑ توڑ کیتے متحرک تھئی گئے آصف زرداری نے کراچی اچ وزیر اعلی بلوچستان عبدالقدوس بزنجو تے انہاں دی کابینہ دے اعزاز اچ ڈیتے گئے عشائیہ دے موقع تے انہاں نال ملاقات کیتی۔ سابق صدر آصف علی زرداری نے آکھیا ھِ کہ بلوچستان دا مستقبل بہوں روشن ھِ میکوں بلوچستان نال اتنا ہی پیار ھِ جتنا پاکستان نال ھِ ایں موقع تے زرداری نے آکھیا کہ بلوچستان اچ جمہوری طریقیاں نال تبدیلی چنگا اقدام ھا تے وزیر اعلی بلوچستان عبدالقدوس بزنجو نے جمہوری تسلسل کوں اگوں ودھائے جیندے کیتے او مبارکباد دے مستحق ھن انہاں آکھیا کہ اساں بلوچستان دے عوام دیاں محرومیاں کوں بخوبی جانڑدے ھیں تے اساں سبھ دے مسائل کوں نا صرف سمجھدے ھیں بلکہ انہاں دا حل وی چاھندے ھیں تے اساں اپنڑیں دور اچ بلوچستان دے عوام دے مسائل حل وی کیتے ۔ سابق صدر نے آکھیا کہ این ایف سی ایوارڈ نال بلوچستان دے مالی وسائل اچ اضافہ کیتا۔ بلوچستان دے عوام باشعور ھن آپ اپنڑیں عوام دے شعور دا فائدہ چاون، میں انہاں دے نال ھاں آصف زرداری نے آکھیا کہ اساں بھائی بھائی ھیں تے ڈونہیں بھیرا مل تے ھک ڈوجہے دے مسائل دا حل کڈھوں ۔ علاوہ ازیں وزیر اعلی سندھ سید مراد علی شاہ نے وزیر اعلی بلوچستان عبدالقدوس بزنجو تے انہاں دی کابینہ دے اراکین کوں وزیر اعلی ہاوس پھجن تے خوش آمدید آکھیندے ہووے آکھیا کہ سندھ تے بلوچستان دے عوام تاریخی طور تے ھک ھن تے اساں ھک ڈوجہے دی خوشی تے تکلیف اچ نال نال ھیں۔
انہاں نے بلوچستان دے عوام کوں مخاطب کریندے ہووے آکھیا کہ میکوں تساڈی دھرتی دا درد ھِ میں ہر جاء خود ونجن کیتے تیار ھاں اساں بلوچستان کوں ایں واسطے حقوق نا ڈیندے ھاسے کہ افراد امیر تھئی ونجن بلکہ اساڈی سوچ ھائی کہ عوام امیر تھئی ونجن اگر میں وزیر اعظم بنڑدا تاں کیا میں ١٨ ویں ترمیم کر سکدا کیا میں پختوناں کو حقوق ڈے سکدا؟
