وزیر خارجہ مخدوم شاہ محمود قریشی رومانیہ و سپین دے چار ݙینھ دے سرکاری دورے تے روانہ
اسلام آباد۔ (اے پی پی):وفاقی وزیر خارجہ مخدوم شاہ محمود قریشی رومانیہ تے سپین دے چار ݙینھ دے دورے تے روانہ تھی ڳئن ،دورے دے دوران وزیر خارجہ انہاں ملکاں دے ہم منصباں اتے ٻئے حکام دے نال ملاقاتاں کریسن ۔ دورے دے پہلے مرحلے اچ وزیر خارجہ 9 ٹوں 10 جنوری تئیں رومانین ہم منصب بوگڈان اوریسکو دی دعوت تے بخارسٹ دا دورہ کریسن ۔شاہ محمود قریشی اپݨے دورے وچ رومانیہ دے وزیر خارجہ سودھے اہم شخصیات دے نال ملاقاتاں کریسن ، انہاں ملکاں اچ ݙو طرفہ تعلقات دے ودھارے، مختلف شعبہ جات اچ ݙو طرفہ تعاون ودھاوݨ سودھے اہم علاقائی و بین الاقوامی امور تے ڳال مہاڑ کیتی ویسی ۔وزیر خارجہ دورے دے ݙوجھے مرحلے اچ10 توں 12 جنوری آپݨے سپینی ہم منصب جوزے مینوئل الباریس بیونو دی دعوت تے سپین دا دورہ کریسن ،ایں دوران او آپݨے ہم منصب اتے پارلیمنٹ دے اراکین نال ملاقاتاں کریسن ۔اتوار کوں روانگی توں پہلے میڈیا دے نال ڳال مہاڑ کریندے ہوئیں وزیر خارجہ شاہ محمود قریشی آکھیے جو رومانیہ اتے سپین ݙو طرفہ اتے یورپی یونین دے تناظر اچ پاکستان دے اہم شراکت دار ہن، سپین اچ پاکستانیاں دی وݙی تعداد رہندی پئی اے جیڑھے جو ݙوہیں ملکاں چال ھک مضبوط پل دا کم کریندی اے ۔ وزیر خاجہ آکھیے جو 2021 اچ پاکستان اتے سپین سفارتی تعلقات دے قیام دی 70ویں سالگرہ جوش و خروش دے نال منائی تے توقع اے جو اے دورہ انہاں ݙوہیں بھرا ملکاں دے نال ودھدے تعاون کوں مزید مضبوط بݨاوݨ اچ معاون ثابت تھیسی ۔
