ملک دشمن عناصر کوں شکست فاش تھیسی، حکومت کتھائیں ویندی پئی اے نا وزیراعظم کوں کوئی ہلا سڳدے، وزیر داخلہ شیخ رشید احمد دی پریس کانفرنس
اسلام آباد۔22جنوری (اے پی پی)وزیرداخلہ شیخ رشید احمد آکھیے جو ٹی ٹی پی پاکستانی جھنڈے ہیٹھ آوے تاں الاوݨ کوں تیار ہیں، ساݙے نال بھڑسن تاں نہ چھڑیسوں، اڄوکے دہشتگردی واقعات نال قوم دے حوصلے نا ڈھاسن، دہشتگرداں کوں شکست فاش تھیسی، پوری قوم اتے سیکیورٹی ادارے ہک مٹھ ہین، 23 امرچ کوں او آئی سی رہنما پاکستان آندے پین، اپوزیشن 23 مارچ دے احتجاج تے غور کرے جیکر قانون ہتھ اچ نہ ڳھدا تاں کؤئی کڄھ نا آکھسی۔ اسلام آباد اچ پریس کانفرنس کریندے انہاں آکھیا جو او آئی سی اجلاس کیتے اسلام آباد اچ 21 مارچ توں کڄھ ݙینھ سڑکاں بند تھی سڳدن، اپوزیشن 23 دے بجائے بیشک 27 کوں مارچ کر ڳھنے۔ انہاں آکھیا جو اڄوکے دہشتگردی واقعات دی تحقیقات جاری ہین، کہیں ذمہ داری نئیں منی بھل ایندے اچ بیرونی ہتھ ملوث تھی سڳدے، کہیں وی ناخوشگوار واقعے نال نبڑݨ کیتے سیکیورٹی ادارے الرٹ ہین۔ انہاں آکھیا جو عمران خان اپوزیشن دیاں جڑاں اچ ٻیھ ڳین، اپوزیشن کیہڑے نک نال عدم اعتماد دی ڳالھ کریندی اے، حکومت کتھائیں ویندی پئی اے نا وزیراعظم کوں کوئی ہلا سڳدے، ایمرجنسی اتے صدارتی نظام دیاں ڳالھیں صرف شوشݨی ہین۔ انہاں واضح کیتا جو میݙے وزیر داخلہ ہوندے اسلام آباد اچ ناکے بحال نہ تھیسن۔
