دنیا دے وانگوں پاکستان ءچ وی کورونا وائرس دے کیس سامنڑیں آوݨ دے بعد پاکستان کرکٹ بورڈ (پی سی بی ) دی پیش کش دے بعد ١٠ غیر ملکی کھلاڑی پاکستان سپر لیگ (پی ایس ایل ) توں فوری طور تے دستبردار تھئی گئے ۔
پاکستان کرکٹ بورڈ دے ترجمان نے تصدیق کیتی ھائی کہ بورٹ دی طرفوں غیر ملکی کھلاڑیاں کوں آپشن ݙیتا گئیا ھِ کہ اگر او ٹورنامنٹ توں دستبردار تھیوݨ چاھون تاں تھئی سکدے ھن۔ انہاں اے وی ڈسیا کہ ایں ویلے اہم صورتحال دا جائزہ گھیندے پئے ھیں تے ساری فرنچائزاں نال رابطے ءچ ھیں جیویں ھی ایں حوالے نال کوئی گالھ سامنڑیں آندی ھِ ایکوں میڈیا دی آگاہی ءچ گھن تے آسوں۔ رپورٹاں دے مطابق پی سی بی حکام نے غیر ملکی کھلاڑیاں نال ملاقات کر تے انہاں کوں دنیا ءچ کورونا وائرس دے پھیلݨ دی وجہہ نال احتیات کرݨ تے ایں سلسلے ءچ چاتے گئے قدم دی تفصیل نال آگاہ کیتا۔
