پاکستان دا جھیڑیں نال نبݨݨ سانڳے اقوام متحدہ دے امن مشن دے کردار کوں تکڑا بݨاوݨ دا مطالبہ
اقوام متحدہ۔21فروری(اے پی پی) پاکستان پوری دنیا اچ جھیڑیں توں متاثرہ علاقیں اچ اقوام متحدہ دے امن مشن دے کردار اتے صلاحیت کوں تکڑا بݨاوݨ تے زور ݙیندے ہوئیں آکھیے جوامن مشنز کوں انہاں علاقیں اچ جھیڑیں دی بنیادی وجہ کوں حل کرݨ دیاں کوششاں دا حصہ ہووݨا چاہیدے ۔ اقوام متحدہ اچ پاکستان دے مستقل مندوب منیر اکرم گزریل ݙینھ امن آپریشنز متعلق قائم کمیٹی دے اجلاس اچ ݙسائے جو امن مشن کوں ھک مجموعی سیاسی حکمت عملی دا حصہ ہووݨا چاہیدے جیڑھے جھیڑیں تے تشدد دی بنیادی وجوہات کوں حل کرݨ دی کوشش کریندی اے۔ انہاں آکھیے جو گزریل کئی سالاں اچ پوری دنیا اچ تھیوݨ آلے جھیڑیں توں متاثرہ ملکاں اچ 47 امن مشنز اچ پاکستان دے 2لکھ توں ودھ اہلکاراں خدمات انجام ݙتن ، ایں توں علاوہ متنازع جموں و کشمیر اچ لائن آف کنٹرول (ایل او سی) تے جنگ بندی دی نگرانی سانڳے اقوام متحدہ دے بݨائے ڳئے مشن (یو این ایم او جی آئی پی) دی میزبانی وی کریندا پئے ۔ پاکستانی مندوب منیر اکرم اقوام متحدہ دے امن اہلکاراں دے خلاف ودھدے ہوئیں حملیں دا جواب ݙیوݨ تے زورݙتے۔ انہاں اقوام متحدہ دے امن مشنز اتے امن دستیں دے خلاف ودھدی ہوئی مس انفارمیشن اتے ڈس انفارمیشن تے وی تشویش دا اظہار کیتے جیں پاروں انہاں دے تحفظ اتے سلامتی کوں خطرہ اے ۔ پاکستانی مندوب ایں سلسلے اچ ھک تازہ ترین حکمت عملی تجویز کیتی جیڑھی ہر مشن کوں مناسب مالی، انسانی، مادی وسائل اتے جدید صلاحیتاں ݙیوݨ کوں یقینی بݨیسی ۔
