وزیراعظم کیوریٹیو ریویو ریفرنس واپس ڳھنݨ دا حکم ݙے ݙتے
اسلام آباد (اے پی پی) وزیراعظم محمد شہباز شریف سپریم کورٹ دے سینئر ترین جسٹس قاضی فائز عیسیٰ دے خلاف ریفرنس کوں سابق وزیراعظم دی انتقامی کارروائی ، عدلیہ دی آزادی تے شب خون اتے اونکوں ونݙݨ دی مذموم سازش قرار ݙیندیں ہوئیں کیوریٹیو ریویو ریفرنس واپس ڳھنݨ دا حکم ݙے ݙتے۔ خمیس کوں وزیراعظم آفس دے میڈیا ونگ توں جاری بیان اچ آکھیا ڳیا جو کیوریٹیو ریویو ریفرنس کمزور اتے بے بنیاد وجوہات تے دائر تھیا ہئی۔ ایں کیتے حکومت ایندی پیروی نہ کرݨ دا فیصلہ کیتے۔ وزیراعظم دی صدارت اچ کابینہ پہلے ای ایں فیصلے دی منظوری ݙے ݙتی اے۔ بیان موجب وزیراعظم وزیر قانون سینیٹر اعظم نزیر تارڑ کوں جسٹس قاضی فائز عیسیٰ دے خلاف کیوریٹیو ریویو ریفرنس واپس ڳھنݨ دی ہدایت کر ݙتی اے۔ وزیراعظم محمد شہبازشریف آکھیا جو ریفرنس دے ناں تے جسٹس قاضی فائز عیسیٰ اتے انہاں دے ٹبر کوں ہراساں اتے بدنام کیتا ڳیا۔ وزیراعظم آکھیا جو صدرڈاکٹر عارف علوی عدلیہ تے حملے دے جرم اچ آلہ کار اتے ہک کوڑ دے حصہ دار ٻݨیے۔
