اسلام آباد۔30اپریل (اے پی پی)وزارت  مذہبی امور  و بین المذاہب ہم آہنگی سوشل میڈیا تے گستاخانہ مواد روکݨ کیتے میڈیا اتے ایندے نال جڑیے لوکاں دے فعال کردار تے زور ݙیندے آکھیے جو سوشل میڈیا تے گستاخانہ مواد دی حوصلہ شکنی، متعلقہ قوانین و حکومتی اقدامات بارے  عوامی  آگاہی ضروری، ایں سانڳے کوئی وشکایت یا اطلاع پی ٹی آے، ایف آئی اے یا وزارت مذہبی امور کوں کیتی ونڄے۔ وزارت آکھیے جو سوشل میڈیا تے گستاخانہ مواد روکݨ کیتے میڈیا دے اہم کردار سانڳے جامع رہنما اصول ٻݨائن جو وطن اچ تقریبا 10 کروڑ توں ودھ لوک سوشل میڈیا استعمال کریندن جتھاں گستاخانہ و توہین آمیز مواد دی  ‏برائی تیکھے کھنݙدی پئی اے، ایں وبا تے قابو پاوݨ کڄھ لوکاں دا کم نئیں، ایں سانڳے پوری قوم کوں اجتماعی کردار ادا کرݨا ہوسی۔ حکومتی اداراں کوں اپݨی ذمہ داریاں ادا کرݨیاں ہوسن۔ وزارت دے اقدامات موجب میڈیا تے جتھاں اینڄھے مواد دی  حوصلہ شکنی کرݨ دی لوڑھ اے، پاکستان دے متعلقہ قوانین اتے حکومتی سطح تے موجود  گستاخانہ مواد روکݨ دے انتظام کیتے آگاہی وی ݙیوݨی ہوسی جو لوک اینڄھے مواد بارے احتیاط کرن۔ میڈیا ایں بارے والدین کیتے وی خصوصی مہم چلاوے جو انہاں دی وݙی ذمہ داری اے، والدین اپݨے ٻالاں کوں موبائل، لیپ ٹاپ اتے انٹرنیٹ ݙیندن، او اے وی ݙیکھن  جو ٻال سوشل میڈیا تے کیا ݙیہدنِ او کہیں غلط راہ تے نا ٹر پوون۔ توجہ ݙویڄے جو سوشل میڈیا و پرنٹ میڈیا دے دور اچ سیرت نبوی دے انسانیت وشرافت و مکارم اخلاق دا سنیہا موثر انداز اچ مختلف زباناں اچ پیش کیتا ونڄے تاں جو رسول اللہ صلی اللہ علیہ وسلم دی ہمہ جہت، انسانیت دوست، پرامن و قابل احترام شخصیت دے قابل اقتداء پہلو اڳونہے تھیون، سیرت  النبی  صلی  اللہ  علیہ  وسلم بارے پروگرام ٹیلی  کاسٹ کیتے ونڄن، عبادات و اخلاق، معاملات ومعاشرت اچ اسوہ رسول اللہ صلی اللہ علیہ وسلم کوں اپنا تے حقیقی مسلمان دا کردار پیش کر تے ایں گستاخی دا بخوبی ولدا ݙتا ونڄ سڳدے، آزادی  اظہار  رائے دے درست  استعمال اتے ایندی اݙ اچ کہیں وی مذہب دے پیروکاراں دی دل آزاری  ادی سنڳینی بارے آگاہی کریڄے۔ رائے عامہ دی ہمواری، مذہبی  انتہاء  پسندی و تشدد روکݨ، مغرب اچ اسلاموفوبیا ا ودھدا رحڄاݨ مکاوݨ کیتے اسلام دی حقیقی تشریح کیتی ونڄے، علماء  واسکالرز نال تھیون، قانون نافذ کرݨ آلے اداریاں دے ڳانݙھے نال مقدسات اتے شخصیات دی توہین و ایندی نشر و اشاعت بارے شعوع ݙویڄے۔ آگاہی ݙویڄے جو اینڄھے کہیں واقعہ دے بعد لوک قانون ہتھ اچ نا ڳھنن۔ وزارت صلاح ݙتی اے جو سوشل  میڈیا اچ جیکر کوئی گستاخانہ مواد ملے تاں کہیں کوں شیئر یا کہیں کوں فارورڈ نہ کرن ٻھل ایکوں پی ٹی اے کوں ای میل https:/complaint.pta.gov.pk/RegisterComplaint.aspx یا ایف آئی اے کوں ای میل [email protected] یا ہیلپ لائن 786- 345- 111-051 یا وزارت مذہبی  امور و بین المذاہب ہم آہنگی کوں بذریعہ ایڈریس [email protected] یا وٹس ایپ نمبر 3332555 -0306 تے  فوری اطلاع ݙیون۔