تونسہ اتے ٻے چھل دے علاقیاں دے نیڑے صاف اتے مٹھے پاݨی ݙیوݨ کیتے انرویل ڈسٹرکٹ 340 اتے رشیدہ بیگم ویلفئیر آرگنائزیشن ولوں نلکے لاتے ویندے پن
اسلام آباد۔30مئی (اے پی پی سرائیکی سروس) تونسہ اتے ٻے چھل دے علاقیاں دے نیڑے صاف اتے مٹھے پاݨی ݙیوݨ کیتے انرویل ڈسٹرکٹ 340 اتے رشیدہ بیگم ویلفئیر آرگنائزیشن ولوں نلکے لاتے ویندے پن۔ رشیدہ بیگم ویلفئیر آرگنائزیشن دی چیئرپرسن رضوانہ درانی اے پی پی سرائیکی سروس نال ڳالھ مہاڑ کریندیں ہوئیں آکھیاجو ہݨ تئیں ݙاہ نلکے لا ݙتے ڳن۔ ہک نلکے دی لاگت ݙیݙھ لکھ روپے اے۔ تونسہ دے نیڑے دی وستیاں اچ مٹھا پاݨی کائنی۔ انہاں ڳالھ مہاڑ کریندیں ہوئیں آکھیا جو تونسہ دے نیڑے مٹھا پاݨی کائنی اتے کہیں این جی اوز ونڄ تے صرف تصویراں دی حد تئیں کم کیتے اے ڳالھ میکوں لوکاں ݙسائی اے جو لوک تصویراں ٻݨا تے ول ویندن نلکا کوئی نی لا تے ݙیندا، میں اوں ویلھے نلکے دا اسٹیمیٹ لاتا اتے کم شروع کرا ݙتا۔ لوک ترائے چار کلومیٹر پرے ونج تے لائناں اچ لڳ تے اپݨے اتے ٻالاں کیتے پاݨی بھر تے امدن۔ رضوانہ درانی آکھیا جو میں اپݨے ڈونز دی شکر گزار ہم جنہاں مئیں تے اعتماد کیتا اتے پیسے ٻھیجے اللہ پاک انہاں دا حامی و ناصر تھیوے اتے انہاں دا ݙتا قبول کرے۔ میکوں امید اے جو لوک میں تے اعتماد کر تے ڈونیشن ٻھجیندے رہسن۔ میݙے ایں قافلے اچ نال تھیسن کیونجو قطرے قطرے نال دریا ٻݨدے۔
