بلوچستان اچ 19 سالیں بعد قومی کھیڈ تھیوݨ سوھݨا کم اے، اے ایں ڳالھ دی دلیل اے جو اتھاں صحت مندانہ سرگرمیاں کراوݨ ممکن اے، صدر مملکت عارف علوی
کوئٹہ۔30مئی (اے پی پی) صدر مملکت عارف حسین علوی آکھیا جو بلوچستان اچ 19 سالیں بعد قومی کھیڈ تھیوݨ سوھݨا کم اے، اے ایں ڳالھ دی دلیل اے جو اتھاں صحت مندانہ سرگرمیاں کراوݨ ممکن اے۔ اے ڳالھیں انہاں منگل کوں 34 ویں نیشنل گیمز دی چھیکڑی تقریب توں خطاب کریندیں ہوئیں آکھی۔ ایں موقع تے گورنر بلوچستان ملک عبدالولی خان کاکڑ ، صوبائی وزیر کھیل و ثقافت عبدالخالق ہزارہ ، چیف سیکرٹری بلوچستان عبدالعزیز عقیلی وی موجود ہن۔ صدر مملکت عارف حسین علوی آکھیا جو میکوں ایں ڳالھ دی خوشی اے جو قائد اعظم محمد علی جناح اپݨے ذاتی پیسیاں نال 1948 اچ جیڑھی ٹرافی ڳھدی ہئی او اڄ وی بلوچستان اچ موجود اے اتے قائد اعظم دی بلوچستان اتے کھیݙاں نال محبت دا مظہر اے۔ قائد اعظم محمد علی جناح اتے محترمہ فاطمہ جناح نینگراں دی مثبت سدھ اچ ترقی تے خصوصی توجہ ݙیندے ہن۔ 34 ویں نیشنل گیمز دی چھیکڑی تقریب اچ صدر مملکت عارف حسین علوی جتݨ آلی ٹیماں دے نال نال وزیر کھیل و ثقافت بلوچستان عبدالخالق ہزارہ ، چیف سیکرٹری بلوچستان عبدالعزیز عقیلی ، سیکرٹری اسپورٹس محمد اسحاق جمالی ، بلوچستان پولیس دے نمائندے کوں شیلڈ پیش کیتی۔ تقریب اچ بلوچی چاپ سمیت رنگا رنگ پروگرام وی پیش کیتے ڳے۔
