اسلام آباد ۔ اے پی پی – وفاقی حکومت دی ڈو سال دی کارکردگی رپورٹ دے اجرا دے موقع تے منگل کوں اتھاں پریس کانفرنس توں وفاقی وزرا خطاب کریندے ہوئیں حکومت دیاں کامیابیاں دی تفصیلات بارے ڈسایا ۔وفاقی وزیر اطلاعات و نشریات سینیٹر شبلی فراز آکھیے جو پاکستان دے عوام دے سامنڑے ڈو سال دی کاکردگی دی رپورٹ پیش کریندے پیوں جیرھا جو جمہوری طرز عمل ہوندے ، وزیراعظم عمران خان 1996ءاچ پاکستان تحریک انصاف دا منڈھ بدھیا ، ہک پاسے ذاتی مفادات تے ڈوجھے طرح ملک تے قوم دی ترقی ،خوشحالی دے بنیادی مقاصد دا حصول اے جیں کوں اساں آپ دی ترجیح بنڑائے۔اتے ایں بیانیے کوں گھن تے اگوں ٹردے پیوں، ریاست مدینہ دے ترائے بنیادی ستون رحم، انصاف اتے احساس اساڈی دفاعی، معاشی، ثقافتی سرگرمیاں دا احاطہ کریندن ، پاکستان دے عوام ذاتی مفاد دے بیانیہ کوں مسترد کرڈتے ،اساڈامقصد ذاتی کامیابیاں دی تشہیر کائنی بلکہ اندرلے تے باہرلے محاذاں تے دشمن دے عزائم دے خلاف لڑنا اے ، دشمن ہمیشہ اساڈی معیشت کوں ضیان پجاتے نا امیدی اتے افراتفری کھنڈاونڑ چاہندے تے وزارت اطلاعات ایں جنگدا بھرپور مقابلہ کریسی ، حکومت دی بھرپور جدوجہد دے نتیجے اچ اوکھا ویلھا گزر گے تے چنگاں ویلھا شروع تھی گئے ۔اے گال انہاں منگل کوں پاکستان تحریک انصاف دی موجودہ حکومت دے 2 سال پورے تھیونڑ دے موقع تے وزیر خارجہ شاہ محمود قریشی، وفاقی وزیر منصوبہ بندی ترقی و اصلاحات اسد عمر، وفاقی وزیر صنعت و پیداوار حماد اظہر، مشیر خزانہ ڈاکٹر عبدالحفیظ شیخ، وزیراعظم دی معاون خصوصی تخفیف غربت ڈاکٹر ثانیہ نشتر دے رلے پی آئی ڈی اچ پریس کانفرنس نال خطاب کریندے ہوئیں آکھی اے ۔انہاں آکھیے جو 2 سال دی کارکردگی پیش کرنڑ جمہوری حکومت دا طرز عمل ہوندے تے اے اساکوں ہمیشہ موقع ڈیندے جو اساں خود آپنڑے ماضی نال جڑوں ، ایں ملک دا قیام کیوں عمل وچ آئے تے او لوک جنہاں ملک دی تخلیق دی سوچ علامہ اقبال دے خطبہ الہ آباد نال رلائی او سمجھدے ہن جو متحدہ ہندوستان اچ مسلماناں دا سیاسی ، ثقافتی اتے مذہبی مستقبل کیا تھی سگدے ۔انہاں آکھیے جو جغرافیائی طور تے اساں ملک حاصل کیتا تے لیکن اساں انہاں اصولاں تے آپ دی عمارت کھڑی نی کرسگیے ،اساکوں انہاں اصولاں نال رلنڑاں پوسی ۔انہاں آکھیے جو 1996ءاچ پاکستان تحریک انصاف دا وجود عمل اچ آیا اتے عمران خان ”ایاک نعبد و ایاک نستعین“ دی بنیاد تے آپ دی جماعت قائم کیتی ۔ ماضی دے حکمراناں دے ہک پاسے ذاتی مفادات ہن تے ڈوجھے پاسے ملک و قوم دی ترقی و خوشحالی دے بنیادی مقاصد دا حصول اے اتے اساں آپ دی ترجیح بنڑائے ۔ سینیٹر شبلی فراز آکھیے جو وزیراعظم عمران خان غریب پرور اتے محنتی شخصیت ہن ، انہاں دی بنیادی سوچ اے جو ملک کوں اگوں کیویں ودھایا ونجے ، ملک اچ انصاف تے میرٹ دی بالادستی ہووے۔ وزیر اطلاعات آکھیے جو ففتھ جنریشن وار چلدی پئی اے ایں ویلھے ملک کوں اندرلے تے باہرلے محاذاں تے چیلنجز دا سامنڑاں اے ۔ وزارت اطلاعات و نشریات اپنڑاں کردار بھرپور طریقے نال نبھیسی تے انہاں محاذاں تے ڈٹ تے مقابلہ کریسی ۔ وفاقی وزیر آکھیا جو ڈیجیٹل میڈیا دے دور اچ ہر شہری صحافی بنڑگے تے ہر صحافی، ہر شہری اتے ہر وزیر ایں جنگ کوں رل تے لڑنا اے کامیابی اساڈا مقدر ہو سی، اساں کوئی ونڈ نی چاہندے۔ایں موقع تے سارے وزراء آپنڑے آپنڑے شعبے دی 2 سالہ کارکردگی قوم دے سامنڑے رکھی۔
وزیر خارجہ مخدوم شاہ محمود قریشی آکھیے جوبھارت ہمیشہ پاکستان کوں سفارتی کلھا کرنڑ دی کوشش کیتی جیں اچ اونکوں ناکامی تھئی ، جنوبی ایشیا دے سارے ملک بھارت دے توسیعی پسندانہ عزائم دا شکار ہن ۔اساں دوست ملکاں نال تعلقات کوں مستحکم کرنڑ دی پالیسی بنڑائی ،چین نال شراکت داری کوں اقتصادی شراکت داری اچ بدالنڑ دی حکمت عملی بنڑائی گی اے ،اج پوری دنیا افغان امن عمل اچ پاکستان دے مثبت کرداردی معترف اے، ہر عالمی فورم تے پاکستان اتے کشمیر دا نقطہ نظر پیش کیتے ، وزیر اعظم عمران خان اسلامو فوبیا دے مسئلہ کوں عالمی فورمزتے چاتے۔ چین پاکستان دا پرانڑاں آزمودہ یار اے ،راہداری دے ڈوجھے مرحلے اچ غربت مکاونڑ تے زرعی ترقی کوں رلایا گے ۔مشترکہ مقصد دے حصول کیتے ڈوہیں ملکاں دے تعلقات کوں اتے گھن ویسوں ، افریقی ملکاں دے تجارتی تعلقات دا نواں دور شروع تھئے ، وزیراعظم عمران خان کورونا دی صورتحال اچ قرضیں اچ ریلیف کیتے عالمی سطح تے آواز چاتی اے ۔ منگل کوں حکومت دی ڈو سال دی کارکردگی دے حوالے نال میڈیا نال گال مہاڑ کریندے ہوئیں وزیر خارجہ آکھیے جو ماضی دی حکومت پاکستان دا موقف عالمی سطح تے موثر انداز اچ پیش نی کیتا کیوں جو ملک اچ کوئی وزیر خارجہ ہی کائناں ہئی،اساکوں جڈاں حکومت ملی تاں پاکستان سفارتی کلھیپے دا شکار ہئی ۔اج چین ،نیپال،بنگلہ دیش سمیت بئے جنوبی ایشیائی ملک بھارت تے سوال چیندے پن ۔ وزیرخارجہ آکھیے جو اساں وزیراعظم عمران خان دے وژن کوں عملی جامہ پوائے۔۔وزیر اعظم اسلاموفوبیا دے خلاف اقوام متحدہ اچ آواز چاتی۔ متنازع شہریت بل اچ بھارت بنگالیاں کوں دیمک نال تشبیہ ڈتی ، اساں پڑوسی ملکاں نال مثالی دوستی کوں معاشی شراکت داری اچ بدالنڑ چاہندوں ۔چین دے حوالے نال وزیر خارجہ آکھیے جو چین دے نال پرانڑیں تعلقات کوں اساں نواں رخ ڈتے تے بیجنگ نال سٹریٹجک پارٹنرشپ کوں اکنامک سٹریٹجک شراکت داری اچ بدالنڑ دی کوشش کیتی ۔انہاں آکھیے جو سی پیک دے ڈوجھے مرحلے اچ اہم اہداف شامل کیتے گن جیں اچ صنعتی ری لوکیشن،غربت مکاونڑ ،انسانی وسائل اتے زرعی شعبے دی ترقی سمیت بئے شعبے شامل ہن ، اساں ترکی تے یورپی یونین دے نال تجارتی اتے سرمایہ کاری تعلقات کوں ودھارا ڈتا تے ڈو سالاں اچ یورپی یونین دے نال سٹریٹجک انگیجمنٹ پلان دے معاہدے تے دستخط کیتے ۔وزیر اعظم عمران خان دی ترقی پذیر ملکاں دی معاشی بحالی کیتے ڈیٹ ریلیف تجویز کوں اساں دنیا دے سامنڑے رکھیا ،افغان جھیڑے متعلق وزیر خارجہ آکھیا جو روس اتے امریکہ سمیت دنیا افغان مسئلہ دے حل کےتے کھرباں ڈالر خرچ کیتے لیکن مسئلہ حل نہ کر سگیے ،عمران خان دا موقف درست ثابت تھیا جو افغانستان دا مسئلہ طاقت نال حل نی تھی سگدا اج پوری دنیا افغان مسئلے دے سیاسی حل کوں ترجیح ڈیندی پئی اے ،وزیر اعظم عمران خان شروع توں اکھیندے آئن جو افغانستان اچ امن دا رستہ طاقت دے ذریعے ممکن کائنی ،مائیک پومپیو افغانستان اچ قیام امن کیتے پاکستان دے کردار کوں من گھدے ۔وزیر خارجہ آکھیے جو کشمیر دے مسئلے کوں اساں بین الاقوامی سطح تے چاتے ،کوئی وی ایجھا عالمی فورم کائنی جتھاں اساں مسئلہ کشمیر کوں چاتا نہ ہووے ، عالمی انسانی حقوق دی تنظیم پہلی واری مقبوضہ کشمیر اچ انسانی حقوق دیاں سنگین خلاف ورزیاں متعلق ڈو رپورٹاں شائع کیتیاں ۔انہاں آکھیے جو نواز شریف یو این جنرل اسمبلی توں خطاب اچ کشمیر دا ذکرتک نی کیتا لیکن وزیر اعظم عمران خان گزریل سال اقوام متحدہ جنرل اسمبلی اچ جیرھی تقریر کیتی او تساڈے سامنڑے اے ۔ وزیر خارجہ آکھیا جو وزیراعظم کشمیریاں دے سفیردی حیثیت نال عالمی فورمز تے انہاں دا مقدمہ لڑیے۔انہاں آکھیے جو اساں اپنڑی توجہ کوں براعظم افریقہ دے پاسے مبذول کیتی ،افریقہ کانفرنس دا وزارت خارجہ اچ انعقاد کیتا گیا ،ہنڑ افریقی ملکاں اچ خصوصی طور تے کمرشل قونصلرز تعینات کیتے ویندے پن تاں جو افریقہ نال تجارتی اتے معاشی رابطے ودھائے ونجن ۔اساں سٹرٹیجک کمیونیکیشن سیل وزارت خارجہ اچ قائم کیتا۔وزیر خارجہ آکھیے جو کورونا وباءپاروں باہرلے ملکاں اچ پتھے وطن واپسی دے منتظر 214000 پاکستانیاں کوں 478 پروازاں دے ذریعے وطن واپس گھن آیا گیا ۔
حکومت دی ڈو سالہ کارکردگی رپورٹ دے اجراءدے موقع تے منگل کوں میڈیا نال گال مہاڑ کریندے ہوئیں وزیراعظم دے مشیر خزانہ ڈاکٹر عبدالحفیظ شیخ آکھیے جو جڈاں حکومت اقتدار اچ آئی تاں بحران دی کیفیت ہئی ، باہرلے تے اندرلے گھاٹے اتلویں سطح تے ہن ، گزریل پنج سال دے دوران برآمدات دی شرح نمو صفر ہئی ، وزیراعظم عمران خان دی قیادت اچ وفاقی حکومت پائیدار اقتصادی ترقی دافیصلہ کیتا جیں دے نتیجے اچ باہرلے تجارتی گھاٹے 20ارب ڈالر توں ترائے ارب ڈالر تئیں گھٹ تھی گیا ، اقتصادی بحران دی ہک بئی وجہ حکومت دے ودھدے خرچے ہن ، حکومت گزریل ڈو سال دے دوران انہاں خرچیں تے سختی نال کنٹرول کیتے ،کابینہ دے ارکان دیاں تنخواہیں ،، ایوان صدر و وزیراعظم دے خرچے گھٹ کرنڑ دے علاوہ فوج تے سول بجٹ کوں گھٹ کیتا گئے تاں جو اساں ترقیاتی خرچے اچ ودھارے دا عمل جاری رہیا۔ کورونا وائرس دی وبادے دوران درپیش چیلنجزدے حوالے نال وزیراعظم عمران خان ہدایت کیتی جو وبا توں عام بندے دی زندگی متاثر نہ تھیوے، حکومت 1240ارب روپے دا پیکیج ڈتا جیں دے کئی حصے ہن ، زرمبادلہ دے ذخائرہک سال دے دوران ادھ تھی گئے ہن تے ڈیفالٹ دا خطرہ ہئی ، حکومت دے اقتدار اچ آندے ہی ملک کوں ڈیفالٹ تھیونڑ توں بچاونڑ کیتے تے بحران نال نبڑنڑ کیتے حکمت عملی مرتب کیتی گی ۔اقتصادی بحران پاروں ڈالر دا بحران ہئی کیوں جو اساڈی درآمدات 40 ارب جڈاں جو برآمدات 20ارب ڈالر دے نیڑے ہن ،۔ حفیظ شیخ آکھیے جو پاکستان تحریک انصاف دی حکومت گزریل ڈو سال اچ ماضی دے قرضیں دی مد اچ پنج ہزار ارب روپے دیاں ادائیگیاں کیتیاں ۔مشیر خزانہ آکھیے جو وزیراعظم عمران خان دی قیادت اچ وفاقی حکومت پائیدار اقتصادی ترقی دا فیصلہ کیتا جیں دے نتیجے اچ باہرلی تجارتی خسارہ 20 ارب ڈالر توں 3ارب ڈالر تئیں گھٹ تھی گیا ۔ حفیظ شیخ آکھیے جو حکومت ڈو سال اچ سٹیٹ بینک توں کوئی قرضہ گھدے تے نہ ہی کہیں ادارے کوں سپلی مینٹری گرانٹ ڈتی گی اے ۔ میکرو اکانومی کوں مستحکم کیتا گیا ، قومی معیشت دے حوالے نال مقامی تے باہرلے خدشات تے قابو پاتا گیا ۔ٹیکس وصولیاں دی شرح اچ 17فیصد ودھارا تھیا ۔انہاں آکھیے جو حکومت دی ڈو سالہ تاریخ وڈی شاندار اے لوکاں کوں250 ارب روپے امداد ڈتی گی ، کورونا ریلیف پیکج دے تحت ہک کروڑ60 لکھ خانداناںکوں امداد ڈتی گی ۔حفیظ شیخ آکھیا جو زرعی شعبہ کےتے وی حکومت 280 ارب روپے ڈتن ۔ انہاں آکھیے جو کورونا وائرس دے دوران حکومت دے ریلیف پیکج دا عالمی برادری اعتراف کریندی اے اتے موڈیز، فچ اتے عالمی مالیاتی فنڈدے بورڈ آپ دی رپورٹس اچ انہاں اقدامات دا اعتراف کیتے تے انہاں دی تعریف کیتی اے ۔انہاں آکھیے جو گزریل ڈو سال اچ ملک اچ کیتی ونجنڑ آلی غیر ملکی سرمایہ کاری اچ 188فیصد ودھارا تھئے ۔ انہاں آکھیے اجوکے مالی سال دے پہلے جولائی2020ءدے دوران ملکی برآمدات 6فیصد ودھ گن ، سیمنٹ دی وکامت 33 فیصد، پٹرول و ڈیزل دی وکامت15فیصد جڈاں جو موٹرسائیکلز دی وکامت31 فیصد اتے گاڈیاں دی وکامت4 فیصد ودھی اے ۔ ایں دوران 2.8ارب ڈالر دی ریکارڈ ترسیلات زرموصول تھئن۔ انہاں آکھیے جو ایف بی آر ہک مہینے وچ 300 ارب روپے دے ٹیکس وصول کیتے گزریل مالی سال دے مقابلے اچ23فیصد ودھ ہن ۔ انہاں آکھیے جو حکومت ملک دی پائیدار معاشی ترقی دی پالیسی تے پائیدار ترقی دے اقدامات کوں برقرار رکھیسی۔
وفاقی وزےر برائے منصوبہ بندی ، ترقی، اصلاحات تے خصوصی اقدامات اسد عمرسیاسی مخالفین تے نشابر کر ڈتے جو وڈے بحران توں نکل آیوں،کہیں کوں این آر او کائنا ڈیسوں،کپتان کریز تے جم گئے ،ہنڑ لمبی اننگر کھیڈسی،عمران خان لاک ڈاﺅن اچ وی غریباں کوں ودھ اہمیت ڈتی اے،کورونا دی وبا اچ ریاست دے سارے اداریاں اتے ملک دی ساری اکائیاں رل تے کم کیتے۔اے گالھیں انہاں منگل کوں حکومت دی ڈوسالیں دی کارکردگی رپورٹ جاری کرنڑ دے موقع تے آکھی۔اےں موقع تے انہاں آکھیا جو نیشنل کنٹرول اینڈ آپریشن سنٹر(این سی او سی) دے پلیٹ فارم تے مشورے نال کیتے گئے فیصلے کیتے گئن،کوروناوائرس دی وبا پاروں معیشت تے دباﺅ آئے۔انہاں آکھیاجو روزگار دے تحفظ اتے مالی امداد کوں ویلھے تے ڈتی گئی اے۔انہاں آکھیا جو حکومت ثابت کیتے جو ملک دے فائدے اچ ساریاں کوں نال گھن تے ٹرسوں،کمزور طبقے دی مدد عمران خان دا مشن اے۔اسد عمرآکھیا جو اگر گزریل ڈوہفتے وچال آبادی دے تناسب کوں ڈٹھا ونجے تاں پاکستان دے مقابلے اچ بنگلہ دیش اچ کووڈ19- سے شرح اموات 4گنا، بھارت اچ 12 گنا اتے ایران اچ 20 گنا ودھ ہن۔انہاں آکھیا جو مارچ توں جولائی2020ءوچال پاکستان،بنگلہ دیشن اتے بھارت دی برآمدات دا جائزہ گھدا ونجے تاں بنگلہ دیش دی برآمدات 31فیصد جڈانجو بھارت دی 33 فیصد اتے پاکستان دی برآمدات 20 فیصد گھٹ تھی اے۔پاکستان کوں ہک تہائی گھٹ معاشی نقصان تھیے،کورونا وائرس نال معیشت دے علاوہ صحت دے شعبے دا وی بہوں ضٰان تھیے۔انہاں آکھیا جو اگر پی ٹی آئی دی حکومت دی گزریل ڈو سالیں دی کارکردگی کوں ڈٹھا ونجے تاں وزیراعظم عمران خان دا وژن نظر امدے جو حکومت دا کم ملک دے کمزور طبقے دی مدد کرنڑ اے۔انہاں آکھیا جو مالیاتی خسارے تے قابو پاگھدے۔انہاں آکھیا جو وزیراعظم عمران خان دی 22سال دی سیاسی جدوجہد دے بعد تحریک انصاف اقتدار اچ آئی اے اتے عام بندے دی فلاح دے وزیراعظم دے وژن دے تحت انشاءاللہ مستقبل اچ وی پاکستان منزلاں طے کریندا رہسی۔
وزےر اعظم دی معاون خصوصی برائے سماجی تحفظ تے تخفےف غربت پروگرام ڈاکٹر ثانےہ نشتر آکھیا جو غریبی دے خلاف جہاد یکا توں وزیراعظم عمران خان دی ترجیح رہی اے۔27 مارچ 2019ءکوںمملکت پاکستان کو ںریاست مدینہ دے اصولاں تے چلاونڑ سانگے ہک فلاحی ریاست بنڑاونڑ دا عزم کریندیں ہوئیں وزیراعظم احساس پروگرام دامنڈھ بدھیا،کورونا پاروں لاک ڈاﺅن وچال معاشی طور تے متاثر طبقے کوں ریلیف ڈیونڑ سانگے پاکستان دی حکومت لاک ڈاﺅن دے پہلے ڈاہ ڈینھ اچ 16.9 ملین مستحق ٹبراں کوں ہک وار دا مالی عتاون ڈیونڑ سانگے 203 بلین روپے احساس ایمرجنسی کیش پروگرام سانگے رکھیے اتے اے ملک دی تاریخ دا ساریاں توں وڈا سماجی تحفظ دا پروگرام اے جئیں توں تقریباً 109ملین لوکاں فائدہ چاتے ،ہر مستحق ٹبر کوں 12000ہزار روپے دا مالی تعاون ڈتا گئے ۔انہاں اے گالھیں منگل کوں اتھاں حکومت دی ڈو سالیں دی کارکردگی بارے میڈیا نال گالھ مہاڑ کریندیں ہوئیں آکھی۔انہاں آکھیا جو ،احساس پاکستان اچ اپنڑی طرز دا وکھرا پروگرام دے جیڑھا جو ملک دے لکھاں غریباں کوں غریبی دے نہ مُکنڑ آلے چکر توں کڈھ کراہیں ملک کوں فلاحی ریاست بنڑاونڑ آلے پاسے ہک قدم اے۔انہاں آکھیا جو احساس دی وکھری خصوصیت اوندی وسعت،پالیسی فارمیشن، بہترین سٹریٹیجی،گورننس ، مانیٹرنگ فریم ورک اتے بجٹ اے جیڑھا جو قومی سطح دے فلاحی منصوبیاں تے عمل درآمد سانگے ڈتا گئے ۔انہاں آکھیا جو احساس دے ہر پروگرام اچ ایں گالھ کوں یقینی بنڑایا گئے جو غریب اتے حقیقی مستحق بندے ایں توں فائدہ چاون۔انہاں آکھیا جو احساس کفالت غیر مشروط مالی تعاون دا پروگرام اے جئیں توں70لکھ بہوں غریب (100% تریمتیں) کوں2,000 روپے مہینے دی امداد اتے بچت اکاﺅنٹ دی سہولت ڈتی ویندی اے۔انہاں آکھیا جو احساس بلا سود قرضے، 42.65 ارب مالیت دے ایں پروگرام نال چھوٹی سطح دے کاروبار سانگے ملک دے 100پسماندہ ضلعیاں اچ ضرورت منداں کوں 80000روپے دے سود دے بغیر قرضے ڈتے ویندے پئن۔گزریل ہک سال اچ 29ارب روپے دے 8لکھ44ہزارقرضے ڈتے گئن جنہاں اچوں 45فیصد تریمتیں کوں ڈتے گئن۔انہاں آکھیا جو 15ارب روپے مالیت دے احساس آمدن پروگرام دا مقصد غریب پسماندہ لوکاں سانگے آمدنڑ دے ذرائع مہیا کرنڑ اے۔انہاں آکھیا جو مزدور دے احساس سانگے پبلک پرائیویٹ پارٹنرشپ دے ذریعے سیلانی ویلفیر ٹرسٹ دے تعاون نال احساس لنگرپروگرام شروع کیتا گئے جئیں دے تحت ہر لنگر خانے تے ہر ڈینھ چھی سو توں ودھ ڈیہاڑی دار مزدوراں کوں ڈو ویلھے دی روٹی ڈتی ویندی اے۔انہاں آکھیا جو احساس انڈرگریجویٹ سکالرشپ پروگرام اچ ضرورت مند طالب علماں کوں 20ارب روپے دے ڈو لکھ سکالر شپ ڈتے گئن۔انہاں آکھیا جو ساڈھے اٹھ ارب مالیت دا احساس نشوونما پروگرام ماواں اتے بالاں سانگے صحت تے غذا بارے مالی تعاون دا پروگرام اے جیڑھا جو ڈوسالیں توں گھٹ عمر دے بالاں اچ اسٹنٹنگ دے مرض کوں مکاونڑ سانگے شروع کیتا گئے ۔پہلے مرحلے اچ نو ضلعیاں اچ33مرکز بنڑائے گئن۔
وفاقی وزیر صنعت تے پیداوار حماد اظہر آکھیا جو کووڈ19-پاروں پاکستان سودھے پورے جگ دی صنعت اتے کاروبار متاثر تھین جڈانجوں اساں ایں وچال وی سپلائی چین کوں بحال رکھیے تانجو مارکیٹ اچ کوئی گھٹکی نہ تھیوے،حکومت وبا وچال کاروبار،صنعت اتے تعمیرات دے شعبے کوں ویلھے تے کھولے اتے کاروباری شعبے کوں ریلیف ڈتے جئیں دے تحت 30توں35لکھ ایس ایم ایز دے بجلی دے بل معاف کیتے گئن ۔منگل کوں حکومت دی ڈوسالیں دی کارکردگی بارے اتھاں میڈیا نال گالھ مہاڑ کریندیں ہوئیں انہاں آکھیا جو حکومت گزریل ڈو سالیاں وچال ڈو نویں پالیسیاں متعارف کروائن جنہاں اچ الیکٹرک وہیکلز اتے موبائل مینوفیکچرنگ دی پالیسیز شامل ہن۔انہاں آکھیا جو پاکستان تحریک انصاف دی حکومت دے اقتدار اچ آونڑ توں پہلے ملک اچ استعمال تھیونڑ آلے موبائل فونز سمگل تھیندے ہن،حکومت ستر فیصد استعمال تھیونڑ آلے سمارٹ فونز دی سمگلنگ تے قابو پا گھدے ۔انہاں آکھیا جو گزریل پنج سالیں وچال پاکستان سٹیل ملز کو ں تنخواہیں دی مد اچ 35ارب روپے بیل آﺅٹ پیکجز دے تحت 80ارب روپے جاری کیتے گئن جئیں دے بعد ادارے تے 236ارب روپے دا قرضہ اے۔انہاں آکھیا جو حکومت کھنڈ دے کارٹلز دے خلاف اقدامات کیتن اتے وزیراعظم عمران خان شوگر ریفارمز کمیٹی بنڑا ڈتی اے جیڑھی جو کم کریندی پئی اے۔انہاں آکھیا جو برآمدات دی شرح نمو چھی فیصد اے۔انہاں آکھیا جو پاکستان گزریل دور حکومت اچ ایف اے ٹی ایف دی گرے لسٹ اچ شامل کیتا گئیا اتے 27پوائنٹس دا ہدف ڈتا گئیا جنہاں اچوں پاکستان تحریک انصاف دی حکومت ڈو سالیں اچ 14ہدف پورے کر گھدن اتے باقی وی ایں سال پورے کر گھنسوں۔
