آزاد کشمیر کیتے ١١٢٤ میگا واٹ دے سہ فریقی کوھالہ ھائیڈرو پاور منصوبے دے معاھدے تے دستخط کر ݙیتے گئے
تاریخی معاھدے تے دستخط دی ھک تقریب اسلام آباد ءچ منعقد تھئی جئیں تے وزیر اعظم عمران خان تے چینی سفیر یاوجنگ نے وی شرکت کیتی۔
تقریب نال خطاب کریندے ہووے عمران خان آکھیا کہ اے منصوبہ پاک چین اقتصادی راھداری ( سی پیک) دا حصہ ھِ تے معاھدے دے تحت پن بجلی دے ایں منصوبے تے ٢ اعشاریہ ٤ ارب ڈالر دی سرمایہ کاری کیتی ویسی
انہاں ایں معاھدے دا خیر مقدم کریندے ہووے ایکوں پاکستان ءچ سرمایہ کاری دے حوالے نال تاریخی معاھدہ قرار ݙیتا۔ انہاں دا آکھݨ ھا کہ پاکستان ءچ پن بجلی دی پیداوار دی وݙی صلاحت موجود ھِ پاکستان ءچ جئیں ولے تک پانڑیں توں بجلی پیدا تھیندی رہی تاں ایندی قیمت گھٹ ھائی جیندے نتیجے ءچ سستی بجلی ملی تے ترقی وی جھٹ تھئی ، لیکن ایندے بعد درآمدی ایندھن تے انحصار کرݨ نال بجلی دی قیمتاں وی ودھ گئیاں جیندے زرمبادلہ دے ذخائر ، کرنٹ اکاونٹ خسارے تے منفی اثرات تھئے۔
وزیر اعظم آکھیا کہ اساں کوں سستی تے صاف توانائی دی لوڑ ھِ پاکستان ماحولیاتی تبدیلیاں دے اثرات نال سب توں زیادہ متاثر تھیوݨ والے ملکاں ءچ شامل ھِ انہاں آکھیا کہ تیل نال بجلی بنڑاوݨ دے ماحول تے وی اثرات مرتب تھیدے ھن اساں کوں صاف تے سستی بجلی دی لوڑ ھِ تے ایں مقصد پاروں اے منصوبہ وݙی اہمیت دا حامل ھِ ایں نال ملک ءچ صاف توانائی دے رجحان ءچ ودھاوا تھیسی ، جبکہ تعمیرات تے پن بجلی دے منصوبیاں نال نوجواناں دے روزگار دے موقعے ودھسن۔
وزیر اعظم عمران خان آکھیا کہ ایں منصوبے نال کشمیر سمیت پورے ملک کوں ایندا فائدہ پھجسی۔
