نیشنل بینک آف پاکستان نے ڈیرہ اسمائیل خان  ریجنل دفتر بنوں اچ قائم کر ڈیتا

ملک اچ مجموعی طور تے چھ ریجنل دفاتر بند کر ڈیتے گئے ھن جیندے اچ 43 برانچاں دا حامل منافع بخش ریجن ڈیرہ اسمعیل خان ریجنل دفتر وی شامل ھا

ڈیرہ اسماعیل خان (سرائیکی نیوز ۔ بلال احمد سپرا) نیشنل بینک پاکستان دا ڈیرہ اسمعیل خان دا ریجنل دفتر بنوں اچ قائم کر ڈیتا گئیا ، تفصیلات دے مطابق مارچ 2015 اچ وفاقی حکومت نیشنل بینک آف پاکستان دی طرفوں ملک اچ مجموعی طور تے چھ ریجنل دفاتر بند کر ڈیتے ھن جیندے اچ 43 برانچاں دی بندش تے احتجاج وی کیتا گئیا ھا لکن کہیں قسم دی گالھ نا سنڑی گئی تے گالھ صرف تسلیاں تک ہی محدود رہی تاہم ٨ جنوری کوں نیشنل بینک آف پاکستان دے صدر سعید احمد دے دستخطاں دے نال بینک دے ریجنل دفاتر دی تعداد 23 توں ودھا تے 37 کرن دا اعلامیہ جاری کر ڈیتا گئا لیکن نویں ریجنل دفاتر اچ اگر 2015 اچ سرائیکی بیلٹ دے چار بند کئے گئے ریجنل دفاتر اچ تریھ کوں بحال کر ڈیتا گئیا لیکن ڈیرہ اسمعیل خان دے ریجنل دفتر دی بحالی دی بجائے بنوں اچ انہاں ٤٤ برانچاں دے ریجنل دفتر دا اعلامیہ جاری کر ڈیتا گئیا ۔ صوبہ خیبر پختونخوان اچ پشاور ایبٹ آباد مردان سوات تے مانسہرہ اچ ریجنل دفاتر قائم ھن ۔ 2015 اچ جئیں ویلے ڈیرہ اسمعیل خان دا ریجنل دفتر بند کیتا گئیا ھا تاں  اون وقت ڈیرہ اسمعیل خان اچ بینک دے ٤٣ برانچاں تے ریجنل دفتر دے اخراجات کڈھن دے بعد بینک کوں ڈیرہ ریجنل دفتر 57 کروڑ روپے منافع ڈیندا پیا ھا ۔ ڈیرہ اسمعیل خان اچ ھن وی دیجن دے کیمپس آفس دی عمارت موجود ھِ بینک حکام دی طرفوں نویں ریجنل دفاتر دے قیام اچ آبادی تے کاروباری مفادات کوں بنیاد بنڑایا گئیا ایں تناظر اچ بنوں دے مقابلہ اچ ڈیرہ اسمعیل خان اچ چار شوگر ملاں کم کریندیاں پئیاں ھن ھک نویں شوگر مل ، ھک آئل ریفانڈری قائم کیتی ویندی پئی ھِ گومل زام ڈیم نہر توں ہزاراں کنال مزید رقبہ وی سیراب تھیندا پئے ضم شدہ ریجنز اچ ساہیوال ، ڈیرہ غازی خان ، جھنگ بحال تھئی گئے جبکہ ڈیرہ اسمعیل خان کوں بحال نی کیتا گئیا حالانکہ اسٹیٹ بینک تے دیگر بینکاں دے نگران دفاتر وی ڈیرہ اسمعیل خان اچ موجود ھن، ایں سرکلر دی رو نال ایہو جئے نویں ریجنل دفاتر وی قائم کیتے گئے ھن جو ڈوجہے ریجنزتوں فقط چند میل دے فاصلے تے موجود ھن مثلا پشاور ، مردان ، ایبٹ آباد ، مانسہرہ ، سوا، جھنگ، سرگودھا ، میانوالی ، ملتان ، ساہیوال ، وہاڑی ایں صورتحال اچ بنوں دے نال ڈیرہ اسمعیل خان کوں وی ریجن دی سطح تے بحال کیتے ونجن اچ کوئی امر مانع نا رکھیندا ھا ۔