بھارتی سپریم کورٹ دی بی جے پی دی ترجمان نوپور شرما دی نبی آخرالزمان حضرت محمدﷺ متعلق گستاخانہ بیان تے سخت کاوڑ

نئی دلی ۔1جولائی (اے پی پی):بھارتی سپریم کورٹ حکمران بھارتیہ جنتا پارٹی دی ترجمان نوپور شرما دی نبی آخرالزمان حضرت محمدﷺ متعلق گستاخانہ بیان تے سخت کاوڑ کریندے ہوئیں آکھیے جو نوپور شرما کوں پورے ملک توں معافی منڳݨی چاہیدی اے۔کشمیرمیڈیاسروس موجب نوپور شرما سپریم کورٹ اچ اپݨے خلاف ملک دے مختلف حصیں اچ درج کیتے ڳئے مقدمیں کوں ھک جاہ تے منتقل کرݨ متعلق ھک درخواست دائر کیتی ہئی ۔جسٹس سوریہ کانت اتے جے بی پاردی تے مشتمل بنچ کیس دی سماعت اچ آکھیے جو گستاخانہ بیان تے نوپور شرما کوں پورے ملک توں معافی منڳݨی چاہیدی اے۔ جسٹس سوریہ کانت سخت لہجہ اختیار کریندے ہوئیں آکھیے نوپور شرما صرف ایں بنیاد تے جو او ھک پارٹی دی ترجمان ہن، او سارا کجھ نی کرسڳدی او جووی آکھݨ چاہندن، انہاں توں تکبر دی بوں آندی اے انہاں آکھیے نوپور شرما تے ٹی وی چینل دے اینکر ناویکا کمارکوں کہیں وی مذہب دی توہین کرݨ دا کوئی اختیار کائنی ، انہاں آکھیے اڄ بھارت اچ جیڑھا کجھ تھیندا پئے ایندی نوپور شرما کلھی ذمہ وار اے تے انہاں کوں پورے ملک توں معافی منڳݨی چاہیدی اے۔سپریم کورٹ دے بینچ آکھیے نوپور شرما یا تاں سستی شہرت حاصل کرݨ کیتے یا کہیں سیاسی ایجنڈے دے تحت یا ول کہیں نفرت انگیز سرگرمی دے تحت پیغمبر اسلامﷺ متعلق توہین آمیز بیان ݙے تے مسلماناں دے جذبات مجروح کیتن ۔نوپور شرما دے وکیل منندر سنگھ دی ایں درخواست تے جو انہاں دی موکلہ دی زندگی کوں خطرہ اے ، جسٹس سوریہ کانت کاوڑ کریندے ہوئیں آکھیے جو انہاں کوں خطرہ اے یا او خود ملک دی سلامتی کیتے خطرہ بݨ ڳئن ، انہاں آکھیے جیویں انہاں ملک اچ امن وامان دی صورتحال کوں خراب کیتے ،اے تریمت ملک اچ امن و امان دی سنگین صورتحال دی کلھی ذمے وار اے ۔فاضل جج آکھیے جمہوریت اچ گھاہ کوں اڳݨ دا حق اے نہ جو ملک کوں کھاوݨ دا ۔بھارتی سپریم کورٹ آھیے نوپور شرما دے غیر ذمہ دارانہ بیانات دی وجہ توں ادے پور دا واقعہ پیش آئے ۔ عدالت عظمی متعلقہ ٹی وی چینل ٹائمز نائو جیں تے نوپور شرما دا مباحثہ نشرکیتا قئے ایندی اینکر ناویکا کمارکوں وی تنقید دا نشانہ بݨیندے ہوئیں انہاں دے خلاف مقدمہ درج کرݨ دا حکم ݙتے ۔ ٹائمز نائو تے ناویکاکمار ݙوہیں آپݨے اسلام مخالف نظریات کیتے مشہور ہن۔سپریم کورٹ نوپور شرما دی درخواست کوں ناقابل سماعت قرارݙیندے ہوئیں انہاں کوں ہائی کورٹ نال رجوع کرݨ دی ہدایت کیتی ۔ عدالت آکھیے جݙاں تساں کہیں دے خلاف شکایت درج کریندو تاں ایں شخص کوں گرفتار کرڳھدا ویندے ، لیکن کوئی تساکوں (نوپورشرما)کوں ہتھ لاوݨ دی ہمت نی کریندا ، ایں توں تساݙا دبدبہ ظاہر تھیندے۔