وفاقی کابینہ دا اجلاس، پشاور خودکش حملے دے خلاف مذمتی قرارداد متفقہ منظور
اسلام آباد (اے پی پی)وفاقی کابینہ دہشت گردی دی ہر قسم مکاوݨ اتے لوکاں دے جان اتے مال دے تحفظ دا عزم کریندے ساریاں سیاسی قوتاں کوں آکھیے جو دہشت گرداں دے خلاف قومی اتحاد، یکجہتی اتے اتفاق ݙکھاون، سیاسی وانڄھ اتے جھیڑے ہک پاسے ست تے ملک اتے قوم دے فیدے اچ دہشت گردی مکاوݨ دے ہکو سویں ایجنڈے تے ہک تھیون۔ وزیراعظم محمد شہبازشریف دی اڳواݨی اچ وفاقی کابینہ دا اجلاس تھعے جیندے اچ پشاور پولیس لائنز دی مسیت اچ تھیوݨ آلے خود کش حملے دے خلاف متفقہ قرارداد مذمت منظور کیتی ڳئی جو کابینہ واقعے اچ شہید اتے زخمی لوکاں دے ٹٻراں کوں پرچاوݨی ݙیندی اے، اللہ شہدا کوں جنت اچ ڄاہ ݙیوے،
ورثا کوں صبر اتے زخمیاں کوں وݙی صحت ݙیوے۔ کابینہ آکھیے جو اللہ دے گھر اچ نمازیاں کوں نشانہ ٻݨاوݨ آلے مسلمان تھی سڳدن ناں انسان، قرآن وسنت اتے پیغام پاکستان دی صورت امت دے نمائندہ اتے جید علماءکرام دی متفقہ رائے سانڳے اینڄھے واقعات قطعاً حرام اتے اسلام دے احکامات دے صریحاً خلاف ہین، پاکستانیاں دے خون دے ہک ہک قطرے دا حساب ڳھنسوں۔ کابینہ فیصلہ کیتے جو خیبرپختونخوا پولیس اتے “کائونٹر ٹیررازم ڈیپارٹمنٹ” دی تنظیم نو کیتی ویسی، معیاری تربیت، جدید اسلحہ سودھا ضروری سازوسامان ݙیوݨ کیتے ٹھوس اقدامات کیتے ونڄن جو اڳو تے اینڄھے سانحات نا تھیون، پوری قوم اتے سیاسی قیادت کوں قومی دفاع، سلامتی و امن اتے معیشت دے تحفظ کیتے ہک مٹھ تھیوݨا ہوسی۔
