واشنگٹن ۔9دسمبر(اے پی پی):دنیا دے ساریں توں معروف اخبار نیویارک ٹائمز دے 1,000 توں وی ودھ ملازمین ہڑتال شروع کرݙتی۔ جرمن خبررساں ادارے موجب 40 سال توں وی ودھ عرصے بعد پہلی واری اخبار دے دفتر اچ ایں طرح کم بند تھئے ۔اخبار دے ملازمین دی طرفوں چار عشریں توں وی ودھ عرصے بعد ایویں احتجاجی قدم چاتا ڳئے ۔ تنخواہ، دفتر دے ٻاہروں کم کرݨ دی پالیسیاں تے کجھ انتظامی امور دے مسئلیں دی وجہ توں جھیڑے دی ابتدا تھئی۔ نیوز روم دے ملازمین اتے یونین دے ٻئے ارکان آکھیے جو مذاکرات توں ہݨ تھک ڳئن جیڑھے جو گزریل سال مارچ اچ انہاں دے آخری معاہدے دے ختم تھیوݨ دے بعد توں ہی جاری ہن ۔دی نیوز گلڈ لیبر یونین آکھیے جو 8 دسمبر دی ادھ رات کوں انتظامیہ دے نال معاہدے دی آخری تاریخ مقرر کیتی ڳئی ہئی جیں دے بعد ادارے دی طرفوں نیک نیتی نال سودے بازی کرݨ اچ ناکامی دا حوالہ ݙتا ڳیا ۔ واضح رہے دی ٹائمز تے نیویارک ٹائمز گلڈ دے درمیان معاہدہ مارچ 2021 اچ ختم تھی ڳیا ہئی ۔