خطے اچ دہشت گردی دے خطرے نال نبݨݨ کیتے پاکستان دے رلے کم کرݨ کیتے پرعزم ہیسے ، امریکی محکمہ خارجہ

0
15

واشنگٹن (اے پی پی):امریکا آکھیے جو او خطے اچ دہشت گردی خاص طور تے کالعدم تنظیم تحریک طالبان پاکستان (ٹی ٹی پی)دی طرفوں دہشت گردی دے خطرے نال نبݨݨ کیتے پاکستان نال رل تے کم کرݨ کیتے پرعزم ہیسے ۔ امریکی محکمہ خارجہ دے ترجمان نیڈ پرائس افغانستان اچ دہشت گرداں دی ری گروپنگ تے ودھدے تشدد متعلق ھک سوال دے جواب اچ آکھیے جو یقیناً،ساݙا وݙا مقصد اے ہے جوج دہشت گرد افغانستان کوں پاکستان دے خلاف حملیں کیتے لانچ پیڈ دے طور تے استعمال نہ کرسڳن ۔ انہاں آکھیے افغان حکومت مختلف شعبیں خاص طور تے انسداد دہشت گردی دے حوالے نال کیتے ڳئے وعدیں کوں پورا نی کرسڳی ۔ تاں جو انہاں آکھیے جو خطے اچ انسداد دہشت گردی دے حوالے نال امریکا کنے پوری استعداد موجود اےجیں دا مظہراڄوکے مہینیں اچ القاعدہ دے سابق امیر ایمن الظواہری دی ہلاکت اے۔امریکا ایں عہد کوں پورا کیتے جیں دا ذکر صدر جو بائیڈن گزریل سال افغانستان توں غیر ملکی افواج دے انخلادے بعد توں تسلسل نال کریندے پئن جے اساں بین الاقوامی دہشت گرداں کوں افغانستان اچ ول منظم تھیندے ݙیکھسوں تاں اساں کارروائی کریسوں ۔ ترجمان آکھیے جو ایں طریقے نال کارروائی کریسوں جیں توں ساݙے مفادات دا تحفظ تھیوے ۔ انہاں آکھیے اساں پاکستان سودھے خطے اچ آپݨے شراکت داراں نال کم کرݨ کیتے پرعزم ہیسے تے ایں سلسلے اچ خطے اتے ایں توں اڳوں دہشت گردی دے خطرے نال یقینی طورتے نبݨݨ کیتے جیڑھا کجھ اساں کرسڳدوں اساں کریسوں۔ ترجمان زور ݙتے جو پاکستان کئی حوالیں نال ھک اہم شراکت دار اے۔اساں ایں ݙو پاسے تعلقات کوں قدر دی نگاہ نال ݙیکھدوں ، اساں تے ساݙے پاکستان کیتے سانجھی دلچسپی دے شعبیں اچ تعاون ودھاوݨ دے موقع دا خیر مقدم کریندوں ۔ انہاں نشاندہی کیتی جو پاکستان کوں بین الاقوامی ملٹری ایجوکیشن اینڈ ٹریننگ پروگرام توں گرانٹ ملدی اے جیں توں پیشہ ورانہ فوجی تعلیم اتے آپریشنل تے ٹیکنیکل کورسز دی تعلیم ݙتی ویندی اے، ایویں خطرات نال نبݨݨ کیتے ملکی صلاحیتاں کوں تقویت ملدی اے ، بھاویں او انسداد بغاوت ہووے، انسداد دہشت گردی ہووے ، ہنر اچ ودھارے تے کورسز ہوون جیڑھا جو ادارہ جاتی صلاحیت اتے وسائل دے انتظام کوں بہتر بݨیندن ۔ترجمان امریکی محکمہ خارجہ آکھیے ݙو پاسے تعلقات کوں ودھارا ݙیوݨ کیتے اے پروگرام جاری اے جیڑھا جو ݙوہیں ملکاں وچال فوجی تعاون کوں مستحکم کریندے ۔

LEAVE A REPLY

Please enter your comment!
Please enter your name here