جاپان دے سابق وزیر اعظم شنزو آبے نارا شہر اچ قاتلانہ حملے اچ زخمی تھیوݨ توں بعد ہلاک
ٹوکیو (اے پی پی):جاپان دے سابق وزیر اعظم شنزو آبے نارا شہر اچ قاتلانہ حملے اچ زخمی تھیوݨ توں بعد ہلاک تھی ڳئن۔انہاں تے حملہ ھک انتخابی مہم دی تقریب دے دوران اوں ویلھے تھئے جݙاں او تقریر کریندے پئے ہن ،انہاں تے ݙوواری گولی چلائی ڳئی ،گولی لڳݨ توں بعد شنزو آبے زمین تےڈھہہ ڳئے ۔جاپان دے چیف کیبنٹ سیکرٹری ہیروکازو ماٹسونو موجب سابق وزیراعظم کوں نارا شہراچ جمعہ دے ݙینھ ساڈھے 11 وڄے گولی ماری ڳئی ۔واضح رہے جو شنزو آبے جاپان دے ساریں توں وݙے عرصے تئیں رہݨ آلے وزیراعظم ہن جیڑھے 2006 اچ ھک سال تئیں وزیراعظم رہیے تے ول 2012 توں 2020 تئیں اٹھ سال تئیں وزیر اعظم رہیے۔شنزو آبے صحت خراب تھیوݨ پاروں استعفی ݙے ݙتا ہئی ۔
انھاں بعد اچ ݙسایا ہئی جو انہاں کوں وݙی آنت دی ھک بیماری تھی ڳئی اے جیں کوں السرائیٹیو کولائیٹس آکھیا ویندے۔ٹوکیو دے سابق گورنر یوئچی ماسوزی ھک ٹویٹ اچ ݙسایا ہئی جو 67 سالہ سابق وزیر اعظم حملے اچ زخمی تھیوݨ دے بعد کارڈیو پلمنری اریسٹ دی حالت وچ ہن۔جاپان اچ اے اصطلاح کہیں بندے دی باضابطہ طور تے موت دی تصدیق توں پہلے استعمال کیتی ویندی اے ۔مقامی ذرائع ابلاغ موجب پہلی گولی غالبا شنزو آبے کوں کائنی لڳی لیکن ݙوجھی گولی انہاں دی کنڈ اچ ونڄ لڳی جیں توں بعد او زمین تے ڈھہہ پئے سکیورٹی وختی مبینہ حملہ آور کوں حراست اچ گھن ڳھدا جیں بھڄݨ دی کوئی کوشش نی کیتی ۔مقامی براڈ کاسٹر این ایچ کے پولیس ذرائع دے حوالے نال ݙسایا جو شنزو آبے ہوش اچ ہن جݙاں انہاں کوں فائرنگ دے بعد اوں جاہ توں کڈھیا ڳیا ۔ براڈ کاسٹر موجب پولیس حملہ آور دی گن قبضے اچ گھن ڳھدی تے ایندی شناخت وی تھی ڳئی اے۔پولیس دی حراست اچ ملزم دی شناخت 41 سالہ ٹیٹسوا یاماگامی دے طور تے تھئی اے جیڑھا نارا شہر دے رہݨ آلا جاپان دی میری ٹائم سیلف ڈیفنس فورس دے سابق ممبر ہن جیں کوں نیوی دے برابر سمجھیا ویندے ۔ خیال ظاہر کیتا ویندا پئے جو جیڑھے ہتھیارتوں اوں سابق جاپانی وزیراعظم تے گولی چلائی اوگھراچ تیار کیتا ڳیا ہئی ۔پولیس موجب گولی شنذو ایبے دی گردن اچ لڳی ہئی جیڑھی جان لیوا ثابت تھئی۔جاپان دے سابق وزیر اعظم شنزو آبے دے مستعفی تھیوݨ توں بعد انہاں دے نیڑے اتحادی یوشیڈے سوگا وزیر اعظم بݨیے ہن جنہاں دی جاہ بعد اچ فومیو کشیڈا گھن ڳھدی۔
Leave a Reply