وزیراعظم عمران خان دا کورونا وائرس (کووڈ 19) روکنڑ کیتے قائم نیشنل کمانڈ اینڈ آپریشن سینٹر دا دورہ

وفاقی وزیر اسد عمر اتے این سی او سی دے ڈائریکٹر جنرل آپریشنز و پلاننگ میجر جنرل آصف محمود گورائیہ دی کورونا وائرس دی موجودہ صورتحال، ہنڑ تئیں کیتے ونجنڑ آلے اقدامات تے وائرس روکنڑ کیتے اگوں دی حکمت عملی بارے بریفنگ

 پورے ملک اچ ضروری چیزاں دی دستیابی تے فراہمی کوں برقرار رکھنڑ دے معاملے تے کوئی سمجھوتہ نئی ہوونڑاں چاہیدا ، ذخیرہ اندوزاں اتے سمگلراںکوں نشان عبرت بنڑایا ویسی،وزیراعظم عمران خان

اسلام آباد ۔ وزیراعظم عمران خان آکھیے جو پورے ملک اچ ضروری چیزاں دی دستیابی تے فراہمی کوں برقرار رکھنڑ دے معاملے تے کوئی سمھوتہ نہ ہوونڑاں چاہیدا ، ذخیرہ اندوزاں اتے سمگلروںکوں نشان عبرت بنڑایا ویسی۔ اے گال انہاں جمعے کوں کورونا وائرس (کووڈ 19) روکنڑ کیتے قائم نیشنل کمانڈ اینڈ آپریشن سینٹر (این سی او سی) دے دورے دے موقع تے اظہار خیال کریندے ہوئیں آکھی اے ۔ایں موقع تے وفاقی وزیر منصوبہ بندی اسد عمر اتے این سی او سی دے ڈائریکٹر جنرل آپریشنز و پلاننگ میجر جنرل آصف محمود گورائیہ وزیراعظم کوں کورونا وائرس دی موجودہ صورتحال، ہنڑ تئیں کیتے ونجنڑ آلے اقدامات تے وائرس روکنڑ کیتے اگوں دی حکمت عملی بارے بریفنگ ڈتی ۔ چیف آف آرمی سٹاف جنرل قمر جاوید باجوہ وی ایں موقع تے موجود ہن ۔ وفاقی وزیر منصوبہ بندی اسد عمر، وفاقی وزیر اقتصادی امور محمد حماد اظہر، وفاقی وزیر نیشنل فوڈ سیکورٹی مخدوم خسرو بختیار، وزیراعظم دی معاون خصوصی اطلاعات و نشریات ڈاکٹر فردوس عاشق اعوان، وزیراعظم دے معاون خصوصی صحت ڈاکٹر ظفر مرزا، وزیراعظم دے معاون خصوصی قومی سلامتی ڈاکٹر معید یوسف اتے بئے اعلیٰ سول و عسکری حکام وی بریفنگ اچ موجود ہن ۔ نیشنل کمانڈ اینڈ آپریشن سنٹر کورونا وائرس روکنڑ کیتے قومی کاوشاں کوں مربوط بنڑاونڑ تے قومی رابطہ کمیٹی برائے کووڈ 19 دے فیصلیں تے عمل درآمد کیتے بنیادی مرکز دا کردار ادا کریندا پئے ۔اے سینٹر سارے صوبیں آزاد جموں و کشمیر، گلگت بلتستان تے وفاقی دارالحکومت دے نمائندیں اتے اداریں دے ذریعے پورے ملک اچ ڈیجیٹل اعداد و شمار اتے انٹیلی جنس دی بنیاد تے معلومات دا جائزہ گھننڑ ، انہاں دا تجزیہ کرنڑ تے ایں حوالے نال اقدامات کرنڑ ، صحت اتے فنانس سمیت ساری معلومات اتے اعداد و شمار دی بنیاد تے سفارشات وزیراعظم دی سربراہی اچ قائم قومی رابطہ کمیٹی کوں حقیقی پیش بندی اتے وختی مداخلت کیتے بھجواونڑ دے حوالے نال ون ونڈو آپریشن دے مرکز دے طور تے کم کریندا پئے ۔ وزیراعظم این سی او سی کوں ہدایت کیتی جو کووڈ 19 دی صورتحال دا تجزیہ کریندے ہوئیں اقدامات تجویز کرنڑ دے سلسلے اچ صحت دے انتظام ، مالیاتی اثرات، سماجی، اقتصادی و غذائی تحفظ، سٹریٹجک رابطے اتے شعور بیدار کرنر تے توجہ رکھے ۔ وزیراعظم نیشنل کمانڈ اینڈ آپریشن سینٹر دے قیام اتے ہنڑ تئیں این سی او ولوں پیشرفت دی تعریف کریندے ہوئیں آکھیا جو اساکوں ملک اچ کورونا وائرس دے کھنڈنڑ کوں روکنڑ تے این سی او سی دے ذریعے فیصلیں دے موثر نفاذ دے حوالے نال ودھ ساری کوشش کرنڑ دی ضرورت اے ۔ وزیراعظم ایں گال کوں دہرائے جو اساکوں پورے ملک اچ ضروری غذائی چیزاں دی دستیابی تے فراہمی برقرار رکھنڑ دے معاملے تے کوئی سمجھوتہ نی کرنڑاں چاہیدا ۔ وزیراعظم ایں سلسلے اچ کوششاں دی ترجیحات متعین کرنڑ تے وفاقی وزیر اسد عمر دی زیر صدارت باقاعدگی اتے وختی اجلاساں دے انعقاد دے ذریعے این این سی او سی دے فیصلیں دے نفاذ دی ضرورت تے زور ڈتا ۔ اے پی پی