وزیراعظم عمران خان دا تعمیرات دے شعبے کیتے پیکیج دااعلان

کورونا دا چیلنج مغرب توں مختلف اے، پورے ملک کوں لاک ڈاﺅن نی کرسگدے ، اساں 1200 ارب روپے دا ریلیف پیکج ڈتے جیں نال عام بندے دی موجودہ صورت حال اچ مشکلات گھٹ کیتی ونج سگدی اے ، نواں پاکستان ہاﺅسنگ سکیم کیتے 30ارب دی سبسڈی ڈیندے پیوں لوکاں کوں روزگار ڈیونڑ کیتے زراعت دے بعد ڈوجھا وڈا سیکٹر تعمیرات دا اے، شعبہ تعمیرات کوں انڈسٹری دا درجہ ڈیندے پیوں ، تعمیرات کیتے کنسٹرکشن انڈسٹری بورڈ دا قیام عمل اچ گھن آیا گئے، تعمیراتی شعبے کوں 14 اپریل توں کھول ڈتا ویسی ایں سال تعمیراتی شعبے اچ سرمایہ لاونڑ آلیں توں ذریعہ آمدن کائناں پچھیا ویسی ، کوئی اے نہ سمجھے جو پاکستان اچ کورونا دا خطرہ کائنی،وزیراعظم عمران خان

اسلام آباد ۔  وزیراعظم عمران خان آکھیے جوکورونا دا چیلنج مغرب توں مختلف اے، پورے ملک کوں لاک ڈاﺅن نی کرسگدے ، اساں 1200 ارب روپے دا ریلیف پیکج ڈتے جیں نال عام بندے دی موجودہ صورت حال اچ مشکلات گھٹ کیتی ونج سگدی اے ، لوکاں کوں روزگار ڈیونڑ کیتے زراعت دے بعد ڈوجھا وڈا سیکٹر تعمیرات دا اے، شعبہ تعمیرات کوں انڈسٹری دا درجہ ڈیندے پیوں ، تعمیرات کیتے کنسٹرکشن انڈسٹری بورڈ دا قیام عمل اچ گھن آیا گئے، تعمیراتی شعبے کوں 14 اپریل توں کھول ڈتا ویسی ایں سال تعمیراتی شعبے اچ سرمایہ لاونڑ آلیں توں ذریعہ آمدن کائناں پچھیا ویسی فکسڈ ٹیکس نافذ کیتا ویسی جیں نال ٹیکس چوری اچ کمی تھیسی ، نواں پاکستان ہاﺅسنگ سکیم کیتے 30ارب دی سبسڈی ڈیندے پیوں ۔ کوئی اے نہ سمجھے جو پاکستان اچ کورونا دا خطرہ کائنی۔

اے گال انہاں جمعے کوں اتھاں تعمیرات دے شعبے کیتے پیکج دا اعلان کریندے ہوئیں آکھی اے انہاں آکھیے جو کورونا وائرس پوری دنیا کیتے ہک چیلنج بنڑ گئے ، پاکستان اچ کورونا دا چیلنج مغرب توں مختلف اے ، مغرب اچ ہک پاسے کورونا اے تاں ڈوجھے پاسے معیشت اے تے پاکستان اچ ہک پاسے کورونا تے ڈوجھے پاسے بھک اے ۔وزیراعطم آکھیے جو چین ووہان کوں پورے طور تے ڈو مہینے کیتے لاک ڈاﺅن کیتی رکھیے ، پاکستان اچ لاک ڈاﺅن دا مطلب اے جو غریب آبادیاں کوں بند کرنڑ اے ،ایں کیتے پورے ملک کوں لاک ڈاﺅن نی کرسگدے ۔انہاں آکھیے جو اساں عام بندے کوں ریلیف ڈیونڑ کیتے 1200ارب دا ریلیف پیکیج ڈتے،ایجھے خاندان جنہاں دا ذریعہ معاش متاثر تھئے انہاں کوں مدد ملسی ۔

انہاں آکھیے جو پاکستان اچ ہک کروڑ لوک پیکیج گھننڑ کیتے رجسٹرد تھئن جیں کیتے حکومت ہک جامع پیکیج دا اعلان کیتے ۔ انہاں آکھیے جو مال بردار ٹرانسپورٹ کوں وی کھلا رکھیا گئے ۔انہاں آکھیے جو ایجھیاں جہیں تے پورا لاک ڈاﺅن کیتا گئے جتھاں عوام دے کٹھے تھیونڑ دا ڈر اے جیویں سکول، کالجز، شادی ہالز اتے کھیڈاں دے میدان ہن ۔انہاں آکھیے جو ایں ویلھے اے اندازہ نی لاتا ونج سگدا جو وائرس کتنا تکھے کھنڈسی لیکن کوئی اے نہ سمجھے جو پاکستان اچ کورونا دا خطرہ کائنی ،اساڈی خواہش اے جو لوکاں کوں روزگار ڈیونڑ کیتے ایں وڈے شعبے کوں ریلیف ڈتا ونجے اساں چاہندوں جو تعمیراتی شعبے نال جڑیے مزدوراں کوں روزگار ملے ۔ وزیراعظم آکھیے جو تعمیراتی شعبہ کھولنڑ نال نال روزگار ودھ ویسی۔ اے پی پی