اسلام آباد ۔ وفاقی وزیر علی امین خان گنڈاپور دی مقبوضہ کشمیر اچ بھارتی افواج دی جاری بربریت دی شدید مذمت کریندیں ہوئیں آکھیا جو قابض بھارتی فوج مقبوضہ کشمیر اچ ظلم دی انتہا کر ڈتی اے اتے کشمیری نینگراں کوں گھر گھر تلاشی دی آڑ اچ ہر ڈینھ شہید کیتا ویندا پئے جئیں دا عالمی برداری کوں نوٹس گھنڑاں چاہیدے۔انہاں آکھیا جو مقبوضہ کشمیر اچ لاک ڈاﺅن کوں ڈاہ مہینے تھی گئن اتے مقبوضہ کشمیر دی عوام کسمپرسی دی حالت اچ دنیا دی ساریاں توں وڈی جیل اچ ہن۔انہاں آکھیا جو اج پورے جگ اچ نسل پرستی دے خلاف آواز چاتی گئی اے اینویں ای جگ کوں بھارت ولوں ہندوانتہاپسندی دی آڑ اچ مسلماناں دے خلاف جاری تعصب دے خلاف وی آواز بلند کرنڑی چاہیدی اے۔انہاں بھارت کوں خبر دارکیتا جو پاکستان ایل او سی تے کہیں قسم دی بھارتی مہم دا منہ بھن جواب ڈیسی اتے پاکستان کشمیریاں دی حمایت جاری رکھیسی۔
(اے پی پی)
