مشیر قومی سلامتی ڈاکٹر معید یوسف دی سینیٹ دی دفاعی کمیٹی کوں قومی سلامتی پالیسی بارے بریفنگ

اسلام آباد۔7جنوری  (اے پی پی):قومی سلامتی دے مشیر قومی سلامتی پالیسی سینیٹ کمیٹی کوں پیش کرݙتی ۔ ڈاکٹر معید یوسف ولوں سینیٹ دی دفاعی کمیٹی  کوں جمعے کوں پارلیمٹ اچ تھیوݨ آلے ان کیمرہ اجلاس اچ ھک جامع بریفنگ ݙتی ۔ سینیٹ سیکرٹریٹ ولوں جاری پریس ریلیز موجب بریفنگ دے دوران قومی سلامتی پالیسی دے خصوصی پہلوواں، ایندیاں مختلف جہتاں، اجزاء اتے نفاذ کیتے مدت دے تعین متعلق امورتے بحث کیتی ڳئی ۔ قومی سلامتی دے مشیر پالیسی دی تشکیل دے عمل اتے پالیسی دے نمایاں خدوخال بارے ݙسایا ۔ نیشنل سیکیورٹی پالیسی دی تشکیل دا عمل 2014ء اچ اوں ویلھے شروع کیتا ڳیا جݙاں نیشنل سیکیورٹی ڈویژن بݨایا ڳیا ہئی۔ گزریل ست سال اچ وفاقی وزارتاں، صوبائی حکومتاں تے بئے سارے سٹیک ہولڈرز دے نال ھک بین الحکومتی مشاورتی عمل شروع کیتا ڳیا جݙاں جو ماہرین تعلیم، یونیورسٹی دے طلبا، آزاد پالیسی ماہرین اتے سول سوسائٹی دے ٻئے ارکان نال وی مشاورت کیتی ڳئی۔ سینیٹ دی دفاعی کمیٹی قومی سلامتی دی پالیسی کوں ھک چنڳاں قدم قرارݙیندے ہوئیں ایندا خیر مقدم کیتے جیڑھا جو سابقہ حکومتاں ولوں کیتے ڳئے قومی سلامتی تے کم کوں اڳوں ودھیندی اے ۔ سینیٹ دی دفاعی کمیٹی دے چیئرمین سینیٹر مشاہد حسین سیّد آکھیے جو بدلدے ہوئے عالمی منظر نامہ کوں ݙیکھدے ہوئیں قومی سلامتی کوں صرف عسکری قوت دے لحاظ نال بیان نی کیتا ونڄ سڳدا ، ایندا دائرہ کار ہݨ صحت، آبادی دے انتظام، وبائی امراض، موسمیاتی تبدیلی، فوڈ سیکورٹی، پاݨی دی کمی اتے تعلیم جہیے انسانی سلامتی دے چیلنجاں کوں ودھاوݨا چاہیدے انہاں ایں ڳال تے وی زور ݙتے جو کشمیر تے نیوکلیئر پروگرام پاکستان دے بنیادی قومی مفادات دا مرکز ہن تے انہاں دا ودھارا تے تحفظ مقدم رہݨا چاہیدے۔  اجلاس اچ سینیٹرز فیصل جاوید، رخسانہ زبیری، ڈاکٹر زرقا سہروردی تیمور، پلوشہ محمد زئی خان، ہدایت اﷲ اتے ولید اقبال شرکت کیتی۔