وزیر اعظم عمران خان روس دے 2 ݙینھ دے سرکاری دورے تے روانہ تھی ڳئن ،وزیراعظم عمران خان ݙو ݙھاکیں بعد روس دا دورہ کرݨ آلے پہلے پاکستانی وزیراعظم ہن

اسلام آباد۔ (اے پی پی):وزیر اعظم عمران خان روسی صدر ولادی میر پیوٹن دی خصوصی دعوت تے روس دے 2 ݙینھ وار تاریخی سرکاری دورے تے روانہ تھی ڳئن ۔ وزیراعظم آفس دے میڈیا ونگ توں جاری بیان موجب وفاقی وزرا مخدوم شاہ محمود قریشی، چوہدری فواد حسین، اسد عمر، حماد اظہر، مشیر تجارت عبدالرزاق دائود، قومی سلامتی دے مشیر ڈاکٹر معید یوسف اتے عامر محمود کیانی وی دورے  اچ وزیراعظم دے رلے ہن۔ وزیراعظم عمران خان اتے روس دے صدر پیوٹن وچال ملاقات ایں دورے  دا اہم ترین جزو ہوسی۔وزیراعظم عمران خان ماسکو اچ روس دی ساریں توں وݙی مسیت اسلامک سنٹر دا دورہ کریسن ۔وزیراعظم عمران خان نال اہم روسی قیادت بشمول نائب وزیر اعظم، روسی سرمایہ کار اتے تاجر وی ملاقاتاں کریسن ۔ صدر پیوٹن نال ملاقات اچ وزیر اعظم بین الاقوامی اتے خطے دے امور تے ڳال مہاڑ کریسن ۔ ملاقات اچ روس پاکستان تعلقات خصوصاً توانائی دے  شعبے تے ڳال مہاڑ تھیسی ۔ اسلاموفوبیا تے افغانستان دی صورتحال تے وی غور تھیسی ۔وزیر اعظم دا دورہ روس اتے پاکستان دے ݙو طرفہ تعلقات کوں مزید مستحکم کریسی ۔وزیراعظم عمران خان ݙو ݙھاکیں بعد روس دا دورہ کرݨ آلے پہلے پاکستانی وزیراعظم  ہن۔