پاکستان پیپلز پارٹی چولستان اتے سرائیکی صوبے دے معاملے تے حکمت عملی بݨیندی پئی اے، امید اے ایندے تے تکھے اڳونہی تھیسی، فیصل کریم کنڈی

اسلام آباد  (اے پی پی سرائیکی سروس)پاکستان پیپلز پارٹی دے مرکزی سیکرٹری اطلاعات فیصل کریم کنڈی آکھیے جو پاکستان پیپلز پارٹی چولستان اتے سرائیکی صوبے دے معاملے تے حکمت عملی بݨیندی پئی اے، امید اے ایندے تے تکھے اڳونہی تھیسی۔ اے پی پی سرائیکی سروس کوں خصوصی انٹرویو ݙیندے ہوئیں پاکستان پیپلز پارٹی دے مرکزی سیکرٹری اطلاعات فیصل کریم کنڈی دا آکھݨ ہا چولستان دا مسئلہ ٻہوں اہم اے جیندے تے حکومت دی اتحادی جماعت ہووݨ پاروں پاکستان پیپلز پارٹی دی ایندے تے دید اے ، پہلے ساݙی وفاق اتے پنجاب اچ حکومت کائناں ہئی تہوں اساں ایندے تے کجھ اڳونہی نیسے کرسڳیے ہݨ ایندے تے حکمت عملی بݨائی ویندی پئی اے سرائیکی صوبے دے حوالے نال سوال دا ولدا ݙیندے ہوئیں انہاں آکھیے سرائیکی صوبے دا مسئلہ حل کرݨ کیتے ایندے تے پارلیمنٹ ، پنجاب اسمبلی اچ ݙو ترھائی اکثریت دی لوڑھ اے ،جیڑھی حالی کہیں حکومت کنے وی کائنی، اساں سمجھدوں جو سرائیکی صوبہ ھک ٻہوں وݙا مطالبہ اے جیندے تے اکثریت تے اتفاق رائے نال فیصلہ تھیوݨا چاہیدے۔ انہاں آکھیے جو سرائیکی وسیب دا وݙا مسئلہ چشمہ رائٹ بینک کینال ہئی اتے ذوالفقار علی بھٹو دا اے خواب اڄوکی حکومت چشمہ لیفٹ کینال دی شکل اچ پورا کریندی پئی اے، چشمہ لیفٹ کینال ݙو سو ستتری ارب روپے دا ھک وݙا منصوبہ اے جیں کیتے بجٹ اچ فنڈز رکھݨ تے اساں وزیراعظم شہباز شریف ، وزیر خارجہ بلاول بھٹو زرداری اتے وفاقی وزیر آبی وسائل سید خورشید شاہ دے مشکور ہیسے ، ایں منصوبے نال ڈیرہ اسماعیل خان تے ایندے علاقیں دیاں زمیناں سیراب تھیسن فصلیں دی پیداوار اچ ودھارے نال کسان خوشحال تھیسی۔