اسلام آباد۔ 27 جنوری (اے پی پی) وفاقی وزارتِ خزانہ آکھیے جو ملکی معیشت مالی سال 2026 اچ ترقی دی رفتار برقرار رکھݨ کیتے موزوں پوزیشن اچ اے پئی، جنوری 2026ء اچ مہنگائی 5 توں گھن تے 6 فیصد دی حد وچ رہسی۔ اے ڳالھ وزارتِ خزانہ ولوں جاری ماہانہ اقتصادی اپ ڈیٹ رپورٹ اچ آکھی ڳئی اے۔ رپورٹ اچ ݙسایا ڳئے جو وݙیاں صنعتاں دی پیداوار تے ٻئے معاشی اشاریاں دی حوصلہ افزا کارکردگی پاروں ملکی معیشت ترقی دی رفتار برقرار رکھݨ دے قابل اے، اے مثبت رجحان محتاط پالیسیاں تے جاری اصلاحات دی عکاسی کریندے۔
رپورٹ دے مطابق کرنٹ اکاؤنٹ خسارے اچ رہݨ دا امکان اے تاہمت ترسیلاتِ زر دی تگڑی آمد تے آئی ٹی برآمدات نال بیرونی دباؤ گھٹ کرݨ اچ مدد ملسی۔ رپورٹ دے مطابق مالی سال دی پہلی چھ مہیوار اچ اوورسیز پاکستانیاں دی ترسیلات 19.33 ارب ڈالر ریکارڈ کیتی ڳئی جیہڑی پچھلے سال دے مقابلے 10.6 فیصد ودھ اے ۔
پہلی چھ مہیوار اچ برآمدات 15.5 ارب ڈالر رہیاں جیہڑیاں 5 فیصد گھٹ ہن، جݙاں جو درآمدات تے 31.3 ارب ڈالر خرچ تھئے ہن۔ سٹیٹ بینک دے زرِ مبادلہ دے ذخائر 16.1 ارب ڈالر ریکارڈ کیتے ڳئن۔ ایف بی آر دے محاصل 6.160 ٹریلین روپے ریکارڈ تھئے ہن جیہڑے پچھلے سال توں 9.5 فیصد ودھ ہن۔ وزارتِ خزانہ دے مطابق زرعی شعبے کوں 1.411 ٹریلین روپے دے قرضے جاری کیتے ڳئن۔ کیپٹل مارکیٹ وی بہترین کارکردگی ݙکھائی اے، 26 جنوری کوں پاکستان سٹاک مارکیٹ دا کے ایس ای 100 انڈیکس 188,587 پوائنٹس ریکارڈ کیتا ڳئے۔
Leave a Reply