اسلام آباد۔31اکتوبر (اے پی پی سرائیکی نیوز سروس) سرائیکی تے بلوچی دے وݙے شاعر خدا یار بے کس جیڑھے سرائیکی دی معروف ادبی شخصیت ڈاکٹر شکیل پتافی دے ݙاݙا ہن انھاں تے تحقیق دا کم ” کلام بےکس” دے عنوان نال کیتا گئے ۔ڈاکٹر شکیل پتافی اے پی پی سرائیکی نیوز سروس نال گالھ کریندے ڈسایا جو میڈے ڈاڈا سرائیکی شاعری اچ حضرت خواجہ فرید سئیں دے شاگرد ہن۔ انہاں دا اپݨا اے شعر ایں ڳالھ دا ثبوت ہے۔
پیر فرید فقیر نے فقرے نکتے سبھ سمجھائے
دفتردردبرہوں دےسارے حرف بہ حرف پڑھائے
ڈاکٹر شکیل پتافی دا بیا آکھݨ ہا جو میں 2010ء اچ انہاں دے سرائیکی کلام دی تدوین کیتی ہئی اتے جھوک پبلشرز ملتان توں “کلام بےکس” دے ناں نال انہاں دا سرائیکی کلام چھپوایا ہا۔ 2017ء اچ کوٹ مٹھݨ دی ہک طالبہ سائرہ سیف انہاں تے بی۔ایس دی سطح دا ہک مقالہ وی لکھیا ہئی۔ ہݨ 2021-2023 دے سیشن اچ “سرائیکی ایریا سٹڈی سنٹر” بہاءالدین زکریا یونیورسٹی ملتان اچ محنت نال میݙے ݙاݙا سئیں تے ایم۔فل سرائیکی دا مقالہ مظفر گڑھ دے ہک سکالر مسعود الرحمن مکمل کیتے۔
