پاکستان متحدہ عرب امارت نال مختلف شعبیاں اچ تعلقات ودھاوݨ چاہندے، وزیراعظم شہباز شریف دی شیخ احمد دلموک المکتوم نال ملاقات اچ ڳالھ مہاڑ

اسلام آباد۔19مئی (اے پی پی) وزیراعظم محمد شہبازشریف آکھیا جو پاکستان متحدہ عرب امارت نال مختلف شعبیاں اچ تعلقات ودھاوݨ چاہندے۔ متحدہ عرب امارات دے سرمایہ کاراں کوں ہرممکن تعاون ݙتا ویسی۔ وزیراعظم آفس دے میڈیا ونگ توں جاری بیان موجب اے ڳالھیں انہاں متحدہ عرب امارات دے شاہی خاندان دے رکن اتے ابوظہبی پورٹس دے چیئرمین شیخ احمد دلموک المکتوم نال ڳالھ مہاڑ کریندیں ہوئیں آکھی جنہاں جمعے کوں وفد دے رلے انہاں نال ملاقات کیتی۔پاکستان اتے متحدہ عرب امارات وچال برادرانہ تعلقات دا ذکر کریندیں ہوئیں وزیراعظم آکھیا جو پاکستان متحدہ عرب امارات نال مختلف شعبیاں اچ خصوصی طور تجارت اتے سرمایہ کار اچ تعلقات ودھاوݨ چاہندے۔ وزیراعظم ابوظہبی پورٹس دا پاکستان دی بندرگاہیں اتے شپنگ دی صنعت اچ سرمایہ کاری اچ دلچسپی دا خیر مقدم کیتا۔ ایں موقع تے وفاقی وزیر خزانہ اسحاق ڈار، وزیر برائے بحری امور سید فیصل علی سبزواری، معاونین خصوسی ڈاکٹر جہانزیب خان، طارق فاطمی اتے متعلقہ اعلیٰ حکام وی موجود ہن۔ پاکستان اچ متحدہ عرب امارات دے سفیر حماد عبید ابراہیم سالم الزابی وی ملاقات اچ موجود ہن۔