وزیر اعظم دی گوادر اچ ڳھاٹی دلچسپی، سی پیک پورٹ سٹی دے منصوبیاں اچ نویں روح پا ݙتی اے

اسلام آباد۔7مئی  (اے پی پی) وزیر اعظم شہباز شریف وزارت عظمیٰ دا منصب سنبھالݨ دے بعد گوادر دی ترقی اچ ڳھاٹی دلچسپی ڳھدی اتے گزریل سال دے ادھ اچ ذاتی طور تے پورٹ سٹی دا دورہ کیتا جتھ انہاں صوبہ بلوچستان کیتے 100 ارب دے ترقیاتی پیکج دے اعلان  اتے شہر کیتے ہک وݙی رقم رکھݨ دے علاوہ ایسٹ بے ایکسپریس وے سودھے بنیادی ڈھانچے دے کلیدی منصوبیاں دا افتتاح کیتا۔ وزیراعظم گزریل سال جون اچ شہر دے دورے اچ گوادر اچ پاݨی، بجلی اتے انفراسٹرکچر دے سارے جاری ترقیاتی منصوبیاں کوں ویلھے تے پورا کرݨ دا حکم ݙتا ہئی۔ انہاں پاݨی اتے بجلی دے منصوبیاں اچ ٻی رکاوٹ کوں ہرگز برداشت نہ کرݨ دی تنبیہ کریندیں ہوئیں آکھیا جو گوادر اچ 12 لکھ گیلن ڈی سیلینیشن پلانٹ کوں جلدی پورا کیتا ویسی۔ وزیراعظم شہباز شریف آکھیا جو گھراں اچ پاݨی دی فراہمی کیتے پائپ لائناں دے نیٹ ورک کوں فوری طور تے بہتر ٻݨایا وںجے اتے منصوبیاں اچ تاخیر دے ذمہ واراں دی نشاندہی کیتے انکوائری دا وی حکم ݙتا۔ شہباز شریف متعلقہ حکام کوں ہدایت کیتی جو گوادربندرگاہ تے ڈریجنگ شروع کرݨ دے نال نال “بریک واٹر” کیتے عملی اقدامات وی کیتے ونڄن۔ صحت دی سہولتاں بارے انہاں ہدایت کیتی جو گوادر ہسپتال دی تعمیر دسمبر دی بجائے ستمبر اچ پوری کیتی ونڄے۔ انہاں گوادر دے سارے 16,523 غریب ٹٻراں کوں بے نظیر انکم سپورٹ پروگرام اچ شامل کرݨ دا وی حکم ݙتا۔ وزیراعظم “چائنا ایڈ”ولوں  گوادر سی واٹر ڈی سیلینیشن پلانٹ، جنگٹل گوادر پرائیویٹ لمیٹڈ، ہینگمی لبریکینٹ پلانٹ، ہینگینگ ایگریکلچرل انڈسٹریل پارک، گوادر ایکسپو سینٹر اتے گوادر فرٹیلائزر پلانٹ دا سنگ بنیاد وی رکھیا، ایں توں علاوہ 3000 سولر پینلز وی تقسیم کیتے۔ گوادر اچ ٻے جاری منصوبیاں اچ گوادر فری زون نارتھ (فیز 11)، گوادر سیف سٹی پراجیکٹ، ترائے بجلی دے منصوبے، گوادر سمارٹ پورٹ سٹی ماسٹر پلان، گوادر ٹورازم پراجیکٹ، پاک چائنا ٹیکنیکل اینڈ ووکیشنل انسٹی ٹیوٹ  دا نواں مینجمنٹ ماڈل  اسٹیٹ آف آرٹ شپ یارڈ پروجیکٹ، آئل ریفائنری پروجیکٹ، گرین گوادر پروجیکٹ، پاک چائنا فرینڈ شپ ہسپتال، فشر کمیونٹی پروجیکٹس، گوادر پورٹ ڈریجنگ پروجیکٹ، ایکسپورٹ تے مبنی پروجیکٹس، فشنگ انڈسٹری، ویئر ہاؤس انڈسٹری، اتے گوادر ہوافہ نمائش اتے تجارتی مرکز شامل ہن۔ ایں توں علاوہ وزیر اعظم شہباز شریف چین پاکستان اقتصادی راہداری (سی پیک) دے ہک حصے چھی لین دی ایسٹ بے ایکسپریس وے دا افتتاح کیتا جو گوادر پورٹ کوں مکران کوسٹل ہائی وے نال ملیندی اے اتے کراچی کوں وی لنک کریندی اے۔ گوادر پورٹ جیڑھا سی پیک دا مرکز اے، تذویراتی طور تے  خلیج فارس دے دہانے تے واقع اے اتے خطے اچ تجارت دا ہک وݙا مرکز ٻݨݨ دی صلاحیت رکھیندے۔ ذرائع ٻیا ݙسیا جو ارباں ڈالر دی لاگت نال سی پیک دے تحت شہر اچ ہݨ تئیں پورے تھیوݨ آلے منصوبیاں اچ گوادر پورٹ، گوادر فری زون ساؤتھ (فیز I)، ایسٹ بے ایکسپریس وے، پاک چائنا ٹیکنیکل اینڈ ووکیشنل انسٹی ٹیوٹ ، پاکستان گوادر فقیر مڈل سکول، فائبر آپٹک، ای کسٹم سسٹم ، پلانٹ ٹشو کلچر لیب اینڈ گرین ہاؤس، لائیو سٹاک، تریمتیں دی زیر قیادت گارمنٹس فیکٹری، گوادر یونیورسٹی اتے جی ڈی اے-انڈس ہسپتال شامل ہن۔