سپریم کورٹ از خود نوٹس کیس: صدر مملکت کوں پنجاب، گورنر خیبر پختونخوا کوں الیکشن کمیشن دی صلاح نال انتخابات دی حتمی تاریخ ݙیوݨ دا حکم
اسلام آباد (اے پی پی)سپریم کورٹ از خود نوٹس کیس دا فیصلہ سݨیدے ہوئے صدر مملکت کوں پنجاب، گورنر خیبر پختونخوا کوں الیکشن کمیشن دی صلاح نال انتخابات دی حتمی تاریخ ݙیوݨ دا حکم ݙتے۔ عدالت ترائے ݙو دے تناسب نال اے فیصلہ سݨائے جیندے اچ جسٹس منصور علی شاہ اتے جسٹس جمال خان مندوخیل دا درخواست گزار دی درخؤاست خارج کرݨ دا اختلافی نوٹ شامل اے۔ عدالت عظمی اچ مختصر فیصلہ چیف جسٹس آف پاکستان جسٹس عمر عطاءبندیال پڑھ تے سݨائے۔ فیصلے اچ آکھیا ڳئے ڄیڑھے صوبے اچ اسمبلی گورنر دے دستخط نال تحلیل تھیسی اتھاں انتخابی عمل دی تاریخ گورنر ہی ݙیوݨ دا پابند اے۔ آئین دے آرٹیکل 222 دے مطابق انتخابات وفاقی سبجیکٹ اے۔
اسمبلیوں دی تحلیل دے نوے ݙینھ اچ انتخابی عمل مکمل کرݨ ضروری اے، وفاقی حکومت ݙوہیں صوبیاں اچ عام انتخابات سانڳے ساریاں ݙیوے، الیکشن کمیشن آف پاکستان نال صلاح توں بعد صدر مملکت پنجاب اچ الیکشن دی تاریخ دا اعلان کرن، الیکشن کمیشن پنجاب اچ الیکشن کیتے صدر مملکت نال فوری مشاورت کرے جیکر 9 اپریل کوں انتخابات ممکن نئیں تاں صلاح نال پنجاب اچ تاریخ بدلیڄ سڳدی اے، گورنر کے پی کے انتخابات دی تاریخ دا اعلان نہ کر تے آئینی ذمہ داری توں مکرین۔ جسٹس منصور علی شاہ اتے جسٹس جمال خان مندوخیل اپݨے اختلافی نوٹ اچ آکھیے جو اے معاملہ آرٹیکل 184/3 تے پورا نئیں آندا، ازخود نوٹس دی بنیاد تے ابہام اے، سپریم کورٹ ہائی کورٹ اچ زیر التوا معاملے تے ازخود نوٹس نئیں ڳھن سڳدی، انتخابات تے ازخود نوٹس دی درخواستاں مسترد کریندے ہیں، انتخابات تے لاہور ہائی کورٹ فیصلہ ݙے چکی اے۔
