برازیل جنوبی امریکہ اچ پاکستان دا اہم تجارتی شراکت دار اے،چیئرمین سینیٹ محمد صادق سنجرانی دی برازیل دے سفیر نال ملاقات اچ ڳالھ مہاڑ

اسلام آباد۔12اگست (اے پی پی):چیئرمین سینیٹ محمد صادق سنجرانی آکھیے جو برازیل جنوبی امریکہ اچ پاکستان دا اہم تجارتی شراکت دار اے، ݙوہیں ملکاں وچال اعلیٰ سطح دے تبادلیں کوں ودھارا ݙیوݨ نال ݙوہیں ملکاں دے تعلقات مزید تکڑے تھیسن ۔ سینیٹ سیکرٹریٹ موجب اے ڳالھ انہاں پاکستان اچ برازیل دے سفیر اولنتھو وئیرا نال ڳالھ مہاڑ کریندے ہوئیں آکھی جنہاں جمعے کوں انہاں نال پارلیمنٹ ہائوس اچ ملاقات کیتی۔ ملاقات اچ ݙو پاسے تعلقات سودھے سانجھی دلچسپی دے امور تے ڳالھ مہاڑ کیتی ڳئی ۔ چیئرمین سینیٹ برازیلین سفیر توں انہاں دی ذال وفات تے اظہار تعزیت کیتے۔ ملاقات دے دوران ݙو طرفہ تعلقات کوں مزید ودھاوݨ دے حوالے نال ڳالھ مہاڑ کیتی ڳئی اے ۔ چیئرمین سینیٹ صادق سنجرانی آکھیے جو پاکستان تے برازیل وچال مضبوط تعلقات ہن، ݙوہیں ملکاں وچال تجارتی تعلقات اتے کثیر جہتی فورمز تے بہترین تعاون قابل ستائش اے، برازیل نال سیاسی، اقتصادی اتے دفاع سودھے سارے شعبیں اچ ݙو پاسے تعلقات کوں مزید ودھاوݨ چاہندوں ۔ انہاں آکھیے پارلیمانی فرینڈشپ گروپس، ڳالھ مہاڑ دے ذریعے ݙوہیں ملکاں وچال عوامی رابطے کوں مضبوط بݨاوݨ اچ اہم کردار ادا کرسڳدن ، ݙوہیں ملکاں وچال اعلیٰ سطح دے تبادلیں کوں ودھاوݨ نال ݙوہیں ملکاں دے تعلقات مزید مضبوط تھیسن ۔ انہاں آکھیے ݙوہیں ملکاں وچال ݙوطرفہ تجارت دا حجم تقریباً 1.3 بلین امریکی ڈالر دے لڳ بھڳ اے جیں کوں مزید ودھایا ونڄ سڳدے ، ڈیری، بیف اتے پولٹری، حلال سیکٹر، فارماسیوٹیکل، زراعت اتے آئی ٹی دے شعبیں اچ برازیل کیتے سرمایہ کاری دے موقع موجود ہن۔