حکومت توں نکل تے سڑکاں تے آیا تاں ودھ خطرناک تھی ویساں، وزیر اعظم عمران خان دے ”آپ کا وزیراعظم آپ کے ساتھ” اچ جوابات

اسلام آباد۔23جنوری(اے پی پی)وزیراعظم عمران خان آکھیے اپوزیشن اپݨی چوری بچاوݨ کیتے سڑکاں تے نکلدی پئی اے، جیکر میں حکومت توں نکل تے سڑکاں تے آیا تاں ودھ خطرناک تھی ویساں اتے مخالفین کوں ٻھڄݨ دی راہ نہ ملسی، قوم ولا وی میݙے نال تھیسی اتے آندی واری وی ساݙی اے، مجرماں نال مفاہمت کیتی تاں اے قوم نال غداری ہوسی۔ آݙت کوں ”آپ کا وزیراعظم آپ کے ساتھ” پروگرام اچ عوام نال براہ راست ٹیلی فون تے الیندے اتے انہاں دے سوالاں دا ولدا ݙیندے وزیراعظم عمران خان آکھیے ہر بے روزگار اتے ملکی دولت لٹݨ آلا سیاستدان شور مچیندے جو میں حکومت ݙھوا ݙیساں، ݙیل تھی ڳئی اے، اے ترائے سالاں توں ساکوں ݙھواوݨ اچ اتے ناکام قرار ݙیوݨ اچ ردھے ہوئن بھل قوم انہاں کوں سنڄاݨ چکی اے اتے اے ول ول ناکام تھیندن، حکومت اپݨی آئینی مدت پوری کریسی، اڳلی واری وی ساݙی اے، اے ٻھالا ڄھلن ڄݙاں میں سڑکاں تے آیا تاں ودھ خطرناک تھی ویساں اتے انہاں کوں ٻھڄݨ دا موقع نہ ملسی۔ وزیراعظم عمران خان نوازشریف دی وطن واپسی دی دعا کریندے آکھیا جو میکوں ایندے ولݨ دی تانڳھ اے، میں شہبازشریف کوں اپوزیشن لیڈر نئیں قومی مجرم سمجھداں ڄئیں ڄوانترے اتے پتر کوں ملک توں فرار کرائے، انہاں دیاں تقریراں تقریری ڳھٹ اتے نوکری دی درخواست زیادہ ہوندن، شہبازشریف کیس روزانہ دی بنیاد تے سݨ تے فیصلہ تھیوݨا چاہیدے، مشرف 2 ٹٻراں دی چوری معاف کرتے جرم کیتے، میں ڈاکوؤں نال مفاہمت نہ کریساں۔