اسلام آباد ۔ وزیر خارجہ شاہ محمود قریشی آکھیے جو بھارت حملے دی غلطی کیتی تاں ایندا منہ بھن جواب ڈیسوں ، بھارت لداخ تے سرجیکل اسٹرائیک کیوں نی کریندا ، بھارت اپنڑے اندرلے حالات توں توجہ ہٹاونڑ کیتے پاکستان کوں تڑیاں ڈیندا پئے ، امیت شاہ دا پاکستان تے حملے متعلق بیان غیرذمہ دارانہ اے، دنیا امیت شاہ دے بیان دا نوٹس گھنے ۔ منگل کوں بھارت ولوں فضائی حملہ کرنڑ دی تڑی تے سخت ردعمل دا اظہار کریندے ہوئیں وزیرخارجہ مخدوم شاہ محمودقریشی بھارت کوں چتاونڑیں ڈتی اے جو اے حماقت نہ کرے ، پاکستان اپنڑاں دفاع کرنڑ جانڑدے ، امیت شاہ کوں واضح کرنڑ چاہنداں جو بھارت حملے دی غلطی کیتی تاں وختی تے منہ بھن جواب ڈتا ویسی ۔
شاہ محمود قریشی آکھیے جو بھارت گیدڑ بھبھکیاں بند کرے ، امیت شاہ دا اج دا بیان غیر ذمہ دارانہ اے ، دنیا کوں امیت شاہ دے بیان دا نوٹس گھننڑاں چاہیدے ۔ وزیر خارجہ آکھیے جو پاکستان ہمیشہ امن دی گال کیتی اے جڈاں جو بھارت نشوم لوکاں دی زندگی نال کھیڈا پئے ۔ شاہ محمودقریشی آکھیے جو امیت شاہ توں پچھنڑ چاہنداں جو انہاں دا بارے کیا خیال اے ؟بھارت لداخ تے سرجیکل اسٹرائیک کیوں نی کریندا ؟۔ لداخ دے معاملے تے بھارتی میڈیا کیوں چپ اے ؟۔وزیرخارجہ آکھیے جو بھارت اپنڑیاں ناکامیاں دا ملبہ پاکستان تے پاونڑ چاہندے ڈوجھے پاسوں بھارت اچ اقلیتاں وی ہندو انتہا پسند بی جے پی حکومت توں اکیے ودن ۔ایندے علاوہ بھارت اچ معاشی حالات وگڑ گئن ، وزیرخارجہ شاہ محمودقریشی مزید آکھیے جو کشمیراچ بھارت ظلم دی انتہا کرڈتی اے تے بھارتی قابض فورسز بے گناہ کشمیریاں تے ودھ سارا ظلم کریندی پئی اے ۔وزیر خارجہ آکھیے جو بھارت افغانستان دے امن عمل کوں سبوتاژکرنڑ چاہندے ، بھارت اپنڑے اندرلے حالات توں توجہ ہٹاونڑ کیتے پاکستان کوں تڑیاں ڈتی کھڑے ۔
