اسلام آباد ، نیشنل ٹیسٹنگ سروس (این ٹی ایس) دے ملازمین 2 مہینے توں تنخواہیں دی عدم ادائیگی تے این ٹی ایس ہیڈ آفس دے باہروں مظاہرہ کیتا ۔ سنوار کون تھیونڑ آلے احتجاجی مظاہرے اچ ملازمین دی ہک وڈی تعداد شرکت کیتی ۔مظاہرین آکھیا ہئی جو رمضان شریف اچ وی این ٹی ایس انتظامیہ کوں غریب ملازماں تے رحم نہ آیا ، حکومت دی واضح ہدایات دے باوجود این ٹی ایس سٹاف گزریل ڈو مہینے توں تنخواہیں توں محروم اے ۔
مظاہرین آکھیے جو تنخواہیں نہ ملنڑ پاروں اساڈے گھراں اچ فاقے آچکن ۔ مظاہرین الزام لاتے جو لکھاں روپے ماہانہ تنخواہ آلے افسراں کوں وختی ادائیگی کرڈتی گئی اے لیکن کجھ ہزار روپے ماہانہ آلے لائر سٹاف دی تنخواہ روک ڈتی گئی افسران بالا اپنڑیاں تنخوایں گھننڑ دے بعد چپ ہن ۔ مظاہرین وزیراعظم پاکستان تے چیف جسٹس توں مطالبہ کیتا جو ایں صورت حال دا نوٹس گھنن ۔ عید سر تے ہے ، وزیراعظم اتے چیف جسٹس این ٹی ایس انتظامیہ کوں اساڈی تنخواہ ادائیگی دا حکم ڈیون ۔ اے پی پی
