اسلام آباد (سرائیکی نیوز) گلیاں تے بازاراں ءچ سبزیاں پھل یا دیگر چھوٹی موٹی چیزاں سر تے رکھ تے ویچݨ والے چھابڑی فروشاں دی آمدن تے وی حکومت دی نظر پئے گئی وفاقی حکومت نے چھابڑی فروشاں کوں رجسٹرڈ کرݨ دا اعلان کریندے ہووے انہاں کیتے فیساں مقرر کر ݙیتیاں۔
نجی ٹی وی چینل دے مطابق وفاق حکوتم نے ھک مسودہ تیار کیتا ھِ جیندے تحت چھابڑی فروشاں کوں رجسٹرڈ کیتا ویسی تے انہاں کوں لائسنس گھنݨ دا پابند کیتا ویسی ، حکومت لائسنس دے بعد انہاں چھابڑی والیاں کولوں پنجھ سو روپے ہر مہینے وصول کریسی ، مسودے ءچ واضح کیتا گئیا کہ اے لائسنس پنجھ سال تک کیتے ہوسی تے ایکوں کہیں ݙوجہے تے ٹرانسفر نی کیتا ونج سکدا تے نا ھی چوݙہ سال توں گھٹ عمر دا کوئی بال اے کم کر سکدے۔ بلدیاتی حکومتی چھابڑی فروش دا علاقہ بدل سکسی ، عمل نا کرݨ تے سامان ضبط کرݨ دی مجاز ہوسی ، مسودے دے متن ءچ آکھا گئیا ھِ کہ نقل مکانی تے رضامندی دی صورت ءچ بلدیاتی عملہ سامان تے نقصان ادا کرݨ دا پابند ھِ مسودے ءچ بے جا تنگ کرݨ والے بلدیاتی حکومتی عملہ کیتے سزا وی تجویز کیتی گئی ھِ کہیں وجہہ دے بغیر چیزاں ضبط کرݨ تے متعلقہ اھلکار کوں ٢٠ ھزار دا جرمانہ تھیسی چھابڑی فروش دیاں چیزاں ضبط کرݨ قابل ضمانت جرم ہوسی۔
