وفاقی وزیر احسن اقبال اتے چین دے نائب وزیر خارجہ وچال ملاقات، مختلف شعبیاں اچ آپسی تعاون کوں ٻیا ودھاوݨ دا عزم

بیجنگ   (اے پی پی) وفاقی وزیر برائے منصوبہ بندی، ترقی اتے خصوصی اقدامات پروفیسر احسن اقبال منگل کوں چین دے نائب وزیر خارجہ سن ویڈونگ بیجنگ اچ ملاقات کیتی۔ ایں موقع تے ݙوپاسہ تعلقات سودھے مختلف شعبیاں تے ڳالھ مہاڑ کیتی ڳی۔ انہاں رلے وزیراعظم دے معاون خصوصی طارق باجوہ،چین اچ پاکستان دے سفیر معین الحق اتے سفارتخانہ دے حکام وی موجود ہن۔ ݙوہیں فریقاں پاک چین لازوال دوستی اتے ’’ سدا بہار سٹرٹیجک کوآپریٹو پارٹنرشپ‘‘ دی اہمیت کوں اجاگر کیتے۔ ݙوہیں فریقاں ݙوپاسہ تعلقات دے سارے پہلواں دا جائزہ ڳھدے جئیں اچ چین پاکستان اقتصادی راہداری (سی پیک ) دے تحت تعاون، تجارتی، اقتصادی اتے مالیاتی تعاون، ثقافتی تبادلے اتے عوام وچال تعلقات شامل ہن اتے تعاون کوں ٻیا مضبوط ٻݨاوݨ دا عزم کیتے۔ وفاقی وزیر منصوبہ بندی ملک دی معاشی مشکلات کوں ڳھٹ کرݨ اتے کورونا وبائی امراض وچال پاکستان دی اہم حمایت تے چینی فریق دا شکریہ ادا کیتا۔ ایں سال جولائی اچ بیلٹ اینڈ روڈ انیشیٹو (بی آر آئی) اتے سی پیک دی ہک ݙھاکا پورا تھیوݨ دا ذکر کریندیں ہوئیں وزیرمنصوبہ بندی ایں سنگ میل کوں شایان شان انداز اچ مناوݨ دے حکومتی عزم دا اظہار کیتا۔