نویں منتخب ارکان قومی اسمبلی سانڳے قائم فیسلی ٹیشن سینٹراسمبلی دے افتتاحی اجلاس تئیں فعال رہسی ،ترجمان قومی اسمبلی
اسلام آباد۔22فروری(اے پی پی):قومی اسمبلی دے ترجمان آکھیے جو نویں منتخب ارکان قومی اسمبلی سانڳے قائم فیسلی ٹیشن سینٹر خمیس 22 فروری توں اسمبلی دے افتتاحی اجلاس تئیں فعال رہسی ۔ قومی اسمبلی سیکرٹریٹ توں جاری بیان موجب ترجمان آکھیے جو فیسلی ٹیشن سینٹر قومی اسمبلی دی کمیٹی روم نمبر 2 اچ بݨایا ڳئے جئیں اچ نویں منتخب معزز ممبران قومی اسمبلی دی آمد دا سلسلہ جاری اے ۔ فیسلی ٹیشن سینٹراچ نویں منتخب ممبران قومی اسمبلی دی رجسٹریشن دے علاوہ کارڈز اتے ٻیاں ضروری دستاویزات سانڳے تصویراں بݨائیاں ویندیاں پئن ۔ نویں منتخب ممبران توں ممکنہ رش پاروں تھیوݨ آلی اوکھ توں بچݨ سانڳے فیسلی ٹیشن سینٹر اچ وختی تشریف گھن آوݨ دی درخواست اے۔نویں منتخب ممبران قومی اسمبلی رجسٹریشن سانڳے آپݨے قومی شناختی کارڈ سودھے ٻئی ضروری دستاویزات نال رکھن ۔
