ضلع خیبر دے قبائل سیالے اچ نقل مکانی کریندے رہندن، کے پی حکومت دے ترجمان ایندے تے بے بنیاد بیان ݙیندن، عطاء اللہ تارڑ

اسلام آباد۔ 27 جنوری(اے پی پی) وفاقی وزیرِ اطلاعات و نشریات عطاء اللہ تارڑ آکھیے جو ضلع خیبر دے قبائل سیالے اچ نقل مکانی کریندے رہندن، خیبر پختونخوا دے ترجمان ایں حوالے نال بے بنیاد ڳالھیں کریندے پئن۔ منگل دے ݙینہہ اسلام آباد اچ وفاقی وزیرِ دفاع خواجہ محمد آصف اتے مشیر اختیار ولی نال پریس کانفرنس کریندے ہوئیں انھاں آکھیے جو خیبر دے آفریدی اتے اکاخیل قبائل ٻئے قبائل توں مختلف ہین، ماضی گواہ اے جو اے قبائل سردیاں اچ ہجرت کریندن اتے گرمیاں اچ واپس تیراہ ول آندن۔ انھاں 1899ء دی کتاب “دی خیبر” دا حوالہ ݙیندے ہوئیں آکھیے جو اوں کتاب اچ وی لکھیا ہویا اے جو اے قبائل 1880ء توں سردیاں اچ ہجرت کریندے پئن۔ وفاقی وزیر آکھیے جو کلائمیٹ چینج پاروں ہݨ برف باری اتے سردی دا ویلھا تبدیل تھی ڳئے، ایں ویلھے جنوری دے چھیکڑ اچ برف پوندی پئی اے جیہڑی پہلے نومبر اچ پوندی ہئی، تہوں اے قبائل نقل مکانی اچ دیر کیتی اتے چھیکڑ تے نکلین۔ انھاں آکھیے جو کے پی حکومت دے اپݨے نوٹیفکیشن دے مطابق خیبر دے قبائل اپݨی مرضی نال ویندے پین اتے وفاقی حکومت دا ایندے نال کوئی تعلق کائنی۔