شعبہ صحت متعلق پالیسیاں اچ بیماریاں دے علاج اتے بچاوݨ تے وی توجہ ݙیوݨ دی لوڑھ اے ، صدر مملکت ڈاکٹر عارف علوی

اسلام آباد۔26اکتوبر(اے پی پی):صدر مملکت  ڈاکٹر عارف علوی میڈیکل شعبے دی تعلیم اچ یونیورسٹی دی خدمات ، مجموعی کارکردگی دی تعریف کریندے ہوئیں آکھیے جو شعبہ صحت متعلق پالیسیاں اچ بیماریاں دے علاج اتے بچاوݨ تے وی توجہ ݙیوݨ دی لوڑھ اے ، ویلھے توں پہلے بیماریاں توں بچاوݨ تے وختی تشخیص نال صحت دےنظام تے پووݨ آلے ٻوڄھ کوں گھٹ کیتا ونڄ سڳدے ۔ ایوان صدر دے پریس ونگ موجب صدر مملکت ڈاکٹر عارف علوی شہید ذوالفقار علی بھٹو میڈیکل یونیورسٹی  اسلام آباد دی سینیٹ دے6 ویں اجلاس توں خطاب کریندے پئے ہن ۔ اجلاس اچ سینیٹر ثمینہ ممتاز اتے شہید ذوالفقار علی بھٹو میڈیکل یونیورسٹی دے وائس چانسلر پروفیسر تنویر خالق سودھے سینیٹ ممبران شرکت  کیتی۔اجلاس اچ یونیورسٹی دی کارکردگی اتے مستقبل دے ترقیاتی منصوبیں تے بریفنگ ݙتی ڳئی ۔ شرکاء کوں ݙسایا ڳئے جو شہید ذوالفقار علی بھٹو میڈیکل یونیورسٹی  نرسنگ دے شعبے سودھے ٻئے شعبیں اچ داخلے ودھا ݙتن ۔ گھٹ عرصے اچ مختلف شعبیں اچ 429 سپیشلسٹ تیار کرچکی اے ،شہید ذوالفقارعلی بھٹو میڈیکل یونیورسٹی بین الاقوامی سطح تے مختلف شعبیں اچ خطیر تحقیقاتی گرانٹس جت چکی اے۔شہید ذوالفقار  علی بھٹو میڈیکل یونیورسٹی میڈیکل دے شعبے اچ تحقیق تے وی چنڳی کاکردگی رکھیندی اے ۔ صدر مملکت ڈاکٹر عارف علوی آکھیے جو بیماریاں توں بچݨ تے توجہ کرتے گھٹ قیمت اچ ملک دی مجموعی صحت دی صورتحال اچ بہتری گھن آئی ونڄ سڳدی اے ،صرف بیماریاں دے علاج تے توجہ نال ملک دی صحت دیاں ضروررتاں پوریاں نی تھیندیاں پیاں ۔صدر مملکت پورے ملک اچ بیماریاں توں بچݨ سانڳے آگاہی دی لوڑھ تے زور ݙیندے ہوئیں آکھیے جو ملک کوں وݙی تعداد اچ ڈاکٹراں تے نرساں دی لوڑھ اے ، جامعات گریجوایٹس ودھاوݨ تے توجہ ݙیون۔