حکومت اسلامی مالیاتی صنعت کوں ودھاوݨ اچ سنجیدہ اتے پرعزم اے، وزیرخزانہ اسحاق ڈار دا اسلامی کیپٹل مارکیٹس دے موضوع تے بین الاقوامی کانفرنس توں خطاب

اسلام آباد۔29مئی (اے پی پی) وفاقی وزیرخزانہ سینیٹرمحمداسحاق ڈار آکھیا جو اسلامی مالیات اتے بینکاری غربت دے خاتمہ اتے معاشرے دی ترقی اچ اہم کردار ادا کر سڳدی اے۔ حکومت اسلامی مالیاتی صنعت کوں ودھاوݨ اچ سنجیدہ اتے پرعزم اے۔ یقین اے جو اسلامی بینکاری اتے مالیات دے تحت چھوٹے اتے وچلے درجے دے کاروبار، زراعت اتے ڳھٹ لاگت دے گھراں دے تعمیر کیتی مصنوعات پیش تھیسن۔ قران کریم اتے اسوہ حسنہ اچ دنیا دے معاشی مسئلیاں دا حل موجود اے۔ سنوار کوں سکیورٹیز اینڈ ایکسچینج کمیشن آف پاکستان ولوں اسلامی کیپٹل مارکیٹ دے موضوع تے بین الاقوامی کانفرنس توں خطاب کریندیں ہوئیں کانفرنس اچ شریک تھیوݨ آلے غیر ملکی وفود دا شکریہ ادا کیتا اتے آکھیا جو ایں موضوع تے بین الاقوامی کانفرنس تھیوݨ نال اسلامی مالیات اتے اسلامی کیپٹل مارکیٹس دے مقاصدکوں اڳوں ودھاوݨ اچ مدد ملسی۔ وزیرخزانہ آکھیا جو اسلامی مالیات اتے اسلامی بنکاری نہ صرف اسلامی بلکہ ٻے ملکاں اچ وی تکھے ودھدی پی اے۔ وزیرخزانہ آکھیا جو آئی ایف ڈی دی رپورٹ دے مطابق ایں ویلھے پوری دنیا اچ اسلامی بینکاری اتےمالیات دے 1679 ادارے کم کریندے پن جئیں اچوں 560 اسلامی بینک ہن، ایں ویلھے اسلامی مالیاتی مارکیٹ داحجم 4 ٹریلین ڈالر اے اتے ایندے اچ سالانہ بنیاداں تے 17 فیصد دی شرح نال نمو تھیندی پی اے۔ 2026 تئیں اسلامی مالیاتی مارکیٹ دا حجم 5.9 ٹریلین ڈالر تئیں ودھݨ دا اندازہ اے۔ ملائشیا، سعودی عرب، سنگاپور اتے اردن ایں ویلھے اسلامی مالیات اتے بینکاری بارے اڳوں ہن۔ سینیٹرمحمداسحاق ڈار آکھیا جو اسلامی مالیات اتے بینکاری غربت دے خاتمہ اتے معاشرے دی ترقی اچ اہم کردار ادا کر سڳدی اے۔ حکومت اسلامی مالیاتی صنعت کوں ودھاوݨ اچ سنجیدہ اتے پرعزم اے۔