حضرت خواجہ غلام فرید رحمتہ اللہ علیہ دا عرس مبارک اڄ توں شروع تھی گئے

 حضرت خواجہ غلام فرید رحمتہ اللہ علیہ دا عرس مبارک  اڄ توں شروع تھی گئے ۔ حضرت خواجہ غلام فرید کوریجہ 26 نومبر 1845ء منگل دے ݙینھ بہاولپور دے قصبہ چاچڑاں شریف اچ ڄمیے۔ آپ دے ٹبر دا نسلی سلسلہ یا شجرہ نسب حضرت عمر فاروق رضی اللہ تعالٰی عنہ نال ملدے۔ آپ دے خاندان اچ ہک بندہ جئیں دا ناں شیخ کوربن، حضرت شیخ پریا ہئی ایں کیتے کور پاروں لفظ کوریجہ ٻݨ ڳیا۔ آپ دے والد دا ناں حضرت خواجہ خدا بخش عرف محبوب الہی ہئی۔ آپ دی اماں آپ جئیں ویلھے چار سالیں دےتھیے انہاں دا انتقال تھی ڳیا اتے آپ دی عمر اٹھ سال تھئی تاں آپ دے والد وی ایں دنیا توں وچھڑ ڳے۔ آپٌ قرآن دی تعلیم میاں صدرالدین اتے میاں محمد بخش توں حاصل کیتا۔ خواجہ غلام فرید فارسی دی تعلیم میاں حافظ خواجہ جی اتے میاں احمد یار خواجہ توں حاصل کیتی۔

حضرت خواجہ غلام فرید دے بزرگاں دے ہک مرید مٹھن خان جتوئی ہن، جئں دے ناں قصبہ مٹھن کوٹ آباد تھیا۔ جݙاں مٹھن کوٹ تے قابض پنجاب دے نال سکھ حاکم مسلماناں کوں تنگ کرݨ آلیے تاں آپ دے والد حضرت خواجہ خدا بخش آپݨے ٹٻر نال مٹھن کوٹ توں چاچڑاں شریف ریاست بہاول پور ونڄ رہیے۔

جݙاں خواجہ فرید نواب آف بہاول پور جئیں دا ناں نواب فتح محمد جیڑھے جو آپ دے والد دے مرید خاص ہن ݙے رہندے ہن تاں اتھاں وی اساتذاہ کرام موجود رہندے ہن جیڑھے خواجہ فرید کوں تعلیم ݙیندے ہن۔ خواجہ فرید شاہی محل اچ گھٹ ودھ  چار سال رہیے۔ جئیں ویلھے  13 سالیں دے تھیے تاں اپݨے وݙے بھرا حضرت فخر جہاں توں بیعت کیتی جیڑھلے عمر 27 سال تھئی تاں اوں ویلھے آپ دے مرشد اتے وݙے بھرا حضرت فخر جہاں دا انتقال تھی ڳیا اتے ولا سجادہ نشین ٻݨیے۔ خواجہ فرید وݙے سخی ہن لنگر دا ہر ݙینھ دا خرچہ 12 مݨ چاول اتے 8 مݨ کنڑک ہئی تے گھٹ ودھ سو توں پنڄ سو بندہ ہر ویلھے   نال رہندا ہئی ۔ جیڑھا کجھ ہوندا  شام تئیں غریباں تے مسکیناں اچ ونݙ ݙیندے ہن

خواجہ فرید جݙاں نواب آف بہاول پور دی دعوت تے ویندے ہن تاں نواب انھاں کوں آندیں ویلھے پنجوی تریہہ ہزار اتے اتھوں ویندیں ہوئیں وی تریہہ چالہی ہزار پیش کریندے اتی نذر نیاز ہوندیں ہوئیں وی جݙاں خواجہ فرید چاچڑاں شریف آندے تاں ڈھیر خرچہ کریندے ۔

خواجہ فرید دی جاگیر توں سالانہ آمدݨ 35 ہزار روپے ہئی او ٻہوں سادہ ہن  ݙینھ اچ کنڑک دی ہک روٹی کھمدے تے رات کوں گئوں دا کھیر پیندے ۔خواجہ فرید 18 سال روہی چولستان اچ رہیے۔ خواجہ فرید آپدے مرید خاص نواب آف بہاولپور جئیں دا ناں نواب صادق محمد رابع عباسی ہئی کوں نصیحت کیتی ہئی جو۔ ” زیر تھی، زبر نہ بن، متاں پیش آوی ” یعنی نرمی کرو، سختی نہ کر ، متاں پیش پووی( اللہ سئیں تساں تے وی سختی کر سڳدن) ۔

خواجہ فرید ست سرائیکی اچ  شاعری کیتی اتے تے سرائیکی زبان دے مجموعے دا  ناں”  دیوان فرید” اے۔ ایندے علاوہ اردو، عربی، فارسی، پوربی، سندھی اتے ہندی اچ وی شاعری کیتی اے، خواجہ فرید  دا اردو دیوان وی موجود اے۔ خواجہ فرید  دے سرائیکی دیوان 271 کافیاں ہن۔

حضرت خواجہ غلام فرید وصال ویلھے ترائے حسرتاں دا اظہار کیتا ہئی۔ (1)                        کاش کوئی میکوں آکھدا جو فرید میکوں رستہ ݙس۔(2)    کاش کوئی میں کنوں یکمشت ہک لکھ روپے منڳدا۔(3)          کاش کوئی میکوں آکھدا فرید میکوں پاݨی پلا۔

وفات ویلھے کلمہ شہادت توں پہلے  حضرت خواجہ غلام فرید کافی دا اے بند پڑھیا۔

ٔآیا   وقت  فرید  چلن دا

گزریا ویلھا کھلن ہسن دا

اوکھا  پیندا  یار  ملن  دا

جان  لباں   تے  آندی  اے

خواجہ فرید  دا وصال چاچڑاں شریف اچ 24 جولائی 1901ء بدھ دے ݙینھ تھیا۔ اوں ویلھے انھاندی عمر 56 سال ہئی۔ انھا ندا دا ہک پتر حضرت خواجہ محمد بخش عرف نازک کریم اتے ہک دھی ہئی۔ خواجہ فرید دا مزار کوٹ مٹھن شریف ضلع راجن پور اچ اے

(APP)