اسلام آباد۔28فروری (اے پی پی) نگران وزیراعظم انوار الحق کاکڑ عدالتی حکم دی تعمیل کریندیں ہوئیں بلوچ لاپتہ کیس اچ اسلام آباد ہائیکورٹ پیش تھی ڳئے۔ جسٹس محسن اختر کیانی لاپتہ طلباء بارے کیس دی سماعت کیتی۔ ایں موقع تے نگران وزیر داخلہ ڈاکٹر گوہر اعجاز خان اتے اٹارنی جنرل آف پاکستان منصور عثمان اعوان وی موجود ہن۔ دوران سماعت نگران وزیر اعظم آکھیا جو حکومت آئین اتے قانون دے مطابق کم کریندی پئی اے۔ انہاں آکھیا جو بلوچستان توں ہووݨ پاروں میکوں صوبے اچ ایں صورتحال بارے ودھ پتہ اے۔ اتھ لوکاں کوں مسلح مزاحمت دا سامݨا اے۔ نگران وزیراعظم آکھیا جو بلوچستان اچ غیر ریاستی عناصر دی سرگرمیاں وی سامھے آئن۔ انہاں آکھیا جو بلوچستان دے ہک سابق چیف جسٹس جیڑھے جو ہک انکوائری دی سربراہی کریندے پئے ہن کوں عسکریت پسنداں شہید کر ݙتا ہئی۔ اٹارنی جنرل ولوں پیش کیتی ڳئی رپورٹ اچ عدالت کوں ݙسیا ڳئیا جو ٻئے 11 طالب علم بازیات تھی ڳئن۔ انہاں دے خلاف مقدمے تھیوݨ دے بعد نو بندے کائونٹر ٹیررازم ڈیپارٹمنٹ (سی ٹی ڈی) دی تحویل اچ ہن اتے ݙو بندے افغانستان چلیے ڳئے ہن۔