دنیا دی آبادی 8 ارب تھی ڳی اے ، اقوام متحدہ
اقوام متحدہ ۔ دنیا دی آبادی 8 ارب تھی ڳی اے۔ جرمن نشریاتی ادارے دے مطابق اقوام متحدہ عالمی یوم آبادی دی مناسبت نال سالانہ آبادی دی رپورٹ جاری کیتی اے۔ رپورٹ اچ آکھیا ڳیا جو 2030 اچ دنیا دی آبادی ودھ تے ساݙھے اٹھ ارب، 2050 اچ 9.7 ارب اتے 2100 اچ 10.4 ارب تھی ویسی۔ رپورٹ اچ دنیا دی آبادی 8 ارب تئیں پڄݨ کوں انسانی ترقی دی راہ اچ ہک اہم سنگ میل قرار ݙتا ڳے۔ رپورٹ اچ آکھیا ڳیا جو عالمی آبادی کوں ست ارب توں اٹھ ارب تئیں تھیوݨ اچ 12 سال لڳن اتے نو ارب تئیں پڄݨ اچ تقریباً 15 سال لڳسن۔
یعنی 2037 تئیں دنیا دی آبادی 9 ارب ہوسی جیڑھی جو عالمی آبادی اچ ہولے ودھارے دی علامت اے۔ رپورٹ دے مطابق 2022 اچ دنیا دے ساریاں توں ودھ آبادی آلےملک ایشیا توں ہن۔ رپورٹ دے مطابق 2022 اچ 1426ملین آبادی نال چین دنیا دی ساریاں توں وݙی آبادی آلا ملک اتے بھارت دی آبادی ایں توں تھوڑی ڳھٹ 1412 ملین ہئی۔ اقوام متحدہ پیشنگوئی کیتی اے جو سن 2050 تئیں عالمی آبادی اچ تھیوݨ آلی مجموعی ودھارے دا ادھ توں زیادہ صرف اٹھ ملکاں تئیں رہسی جئیں اچ پاکستان، بھارت، کانگو، مصر، ایتھوپیا، نائجیریا، فلپائن اتے تنزانیہ شامل ہن
