کورکمانڈر ہائوس لاہور کوں ساڑݨ دے دا ذمہ وار عمران خان اے، وزیراعظم شہباز شریف

لاہور ۔13مئی (اے پی پی) وزیراعظم شہباز شریف آکھیے لاہوراچ کور کمانڈر ہائوس کوں ساڑ ݙیوݨ دے وحشیانہ فعل دے ذمہ وار عمران نیازی ہن کیوں جو انہاں ہی منصوبہ بندی کیتیتے اینکوں بھاہ لاوݨ دی کارروائی تے اکسایا۔ جناح ہائوس دورے ویلھے میڈیا نال ڳالھ مہاڑ کریندے ہوئیں وزیراعظم آکھیے ایں حملے دے منصوبہ سازاں، اکساوݨ آلیں تے حوصلہ افزائی کرݨ آلیں کوں کوئی ریلیف نہ ݙتا ویسی ۔انہاں آکھیے جناح ہاؤس کور کمانڈر لاہور دا گھر ہئی جیں کوں 9 مئی کوں المناک اتے بے دردی نال ساڑیا ڳئے ۔انہاں آکھیے فسادیاں حملہ کرتے گھر کوں بھاہ لاݙتی ، انہاں مزید آکھیے آتش زنی کرݨ آلیں کوں ایں ڳالھ دی پرواہ کائناں ہئی جو اے ھک تاریخی عمارت اے اتے فوجی افسر اتے اوندا خاندان اتھاں رہندا پئے ۔انہاں ریمارکس ݙتن جو ایں عمارت اچ مادر وطن دا او پتر رہندا پیا ہئی جیڑھا آپݨی مادر وطن دی حفاظت تے مامور اے ۔ انہاں آکھیے اے  ظالمانہ اتے ریاست دشمنی دا عمل ہئی جیڑھا ملک دی 75 سالہ تاریخ اچ پہلے کݙاہیں نی تھیا ۔وزیراعظم واقعے تے ڳالھ کریندے ہوئیں آکھیے انہاں کوں ݙکھ تھئے تے آکھیے جو کہیں وی نہ سوچیا ہئی جو ایجھا واقعہ وی تھی سڳدے ۔انہاں مزید آکھیے قوم شرم محسوس کریندی پئی اے تے ایں واقعہ دے بعد ݙکھی اے ۔انہاں آکھیے ایں فعل دا ارتکاب کرݨ آلیں کوں انصاف دی کچاری اچ گھن آیا ویسی ، ایجھے عناصر کوں آئین و قانون دے مطابق عبرت ناک سزا ݙے تے اوکھے ہتھاں نال نبݨیا ویسی تاں جو دنیا انہاں دے انجام کوں دیر تئیں یاد رکھے ۔شہباز شریف آکھیے اے وحشیانہ کارروائی ایں وطن دے انہاں سپوتوتاں دے خلاف کیتی ڳئی جیڑھے ملک اچ امن دے قیام کیتے دہشت گردی کوں مکیندے پئن ، انہاں مزید آکھیے اے انہاں دے خلاف کارروائی ہئی جنہاں ساݙی سرحداں دی حفاظت کیتے آپݨی جاناں قربان کیتن تے انہاں دی گھر آلیاں تے بیوہ اتے انہاں دے ٻال یتیم تھی ڳئن ۔کمبائنڈ ملٹری ہسپتال تے سروسز ہسپتال لاہور دے دورے اچ وزیراعظم ڈی آئی جی آپریشنز علی ناصر رضوی سودھے افسران اتے ہنگامہ آرائی دے دوران فرائض دی انجام دہی دے دوران زخمی تھیوݨ آلے جواناں دی خیریت پچھی ۔ ایں موقع تے نگران وزیراعلی محسن نقوی تے اعلیٰ فوجی اتے سول افسران وزیراعظم  شہباز شریف دے رلے ہن ۔