لاہور (اے پی پی)وزیر اعظم محمد شہباز شریف موٹر سائیکل، رکشہ اتے 800 سی سی تئیں دی گاݙیاں کیتے پٹرول فی لیٹر 50 روپے سبسڈی تے ݙیوݨ دا اعلان کریندے آکھیے جو ڳھٹ آمدن غریب عوام کیتے پٹرولیم سبسڈی ݙتی ویسی اتے ایندا عملی پروگرام تیکھے مکمل کیتا ویسی، ایں سانڳے سارے متعلقہ ادارے جامع حکمت عملی ٻݨاون۔ اے فیصلہ محمد شہباز شریف دی اڳواݨی اچ ڳھٹ آمدن پٹرولیم صارفین کوں پٹرولیم ریلیف پیکج کیتے جائزہ اجلاس اچ کیتا ڳئے۔ وزیراعظم آکھیا جو ڳھٹ آمدن آلے لوکاں کوں چھوٹی ڳاݙیاں تے پٹرول دی مد اچ رعایت ݙتی ویسی تاں جو انہاں تے مہانگ دا ٻھار ڳھٹایا ونڄے۔
وزیراعظم اجلاس نال الیندے آکھیا جو موٹر سائیکل، رکشہ اتے چھوٹی گاݙیاں ڳھٹ آمدن آلے لوکاں دی سواری ہین جیندے تے ریلیف ݙتا ویسی، حکومت ودھ مالی اوکھ دے باوجود غریباں دا ہتھ ونݙاوݨ اچ لڳی ہوئی اے۔ اجلاس اچ وزیر مملکت برائے پٹرولیم مصدق ملک ڳھٹ آمدن لوکاں کوں پیٹرولیم سبسڈی ݙیوݨ دے حکمت عملی تے بریفنگ ݙتی۔ اجلاس اچ وفاقی وزیر خزانہ محمد اسحاق ڈار، وزیراعظم دے مشیر احد چیمہ، وزیر مملکت برائے پٹرولیم مصدق ملک، وزیراعظم دے معاون خصوصی طارق باجوہ، سیکرٹری خزانہ، سیکرٹری پٹرولیم اتے ٻئے اعلی حکام شرکت کیتی۔
