لاہور۔28فروری (اے پی پی) نگران وفاقی وزیر برائے قومی ورثہ تے ثقافت سید جمال شاہ آکھیا جو مادری زباناں اچ لوک ادب بارے ٻالاں اچ آگاہی اتے شعور بیدار کرݨ دی لوڑھ اے تانجو لوک ادب کوں ودھاوݨ اچ مدد مل سڳے۔ انہاں اردو سائنس بورڈ دے دورہ اچ اردوسائنس بورڈ دی کارکردگی دی تعریف کریندیں ہوئیں آکھیا جو معیاری کتاباں دی اشاعت کیتے ٻیا کم کرݨ دی لوڑھ اے۔ انہاں آکھیا جو نویں نسل کوں آپݨی قومی زبان اچ لکھݨ دی ترغیب ݙیوݨ ویلھے دی اہم لوڑھ اے۔ سید جمال شاہ آکھیا جو قومی ،علمی اتے ادبی ادارے معاشرے دی سنڄاݨ ہن۔ ایں توں پہلے اردو سائنس بورڈ دے ڈائریکٹر ضیا اللہ خان طورو اتے ادارے دے افسراں وفاقی وزیر دا استقبال کیتا۔