غیر قانونی طور تے ملک اچ رہݨ آلے غیر ملکیاں دی بے دخلی دے منصوبے متعلق سارے انتظامات اتے تیاریاں مکمل کر ڳھدن ،نگران وفاقی وزیر داخلہ سرفراز احمد بگٹی دی پریس کانفرنس

0
141
غیر قانونی طور تے ملک اچ رہݨ آلے غیر ملکیاں دی بے دخلی دے منصوبے متعلق سارے انتظامات اتے تیاریاں مکمل کر ڳھدن ،نگران وفاقی وزیر داخلہ سرفراز احمد بگٹی دی پریس کانفرنس

اسلام آباد۔26اکتوبر(اے پی پی) نگران وفاقی وزیر داخلہ سرفراز احمد بگٹی آکھیے غیر قانونی طور تے ملک اچ رہݨ آلے غیر ملکیاں دی بے دخلی دے منصوبے متعلق سارے انتظامات اتے تیاریاں مکمل کر ڳھدن ، یکم نومبر دے بعد غیر قانونی غیر ملکیاں متعلق انخلا ، بے دخلی دی پالیسی تے کوئی سمجھوتہ نہ کیتا ویسی ،بے دخل کیتے ونڄݨ آلے غیر ملکی خاندان کوں 50 ہزارتوں ودھ نقدی گھن ونڄݨ دی اجازت نہ ہوسی ۔ او پریس کانفرنس توں خطاب کریندے پئے ہن ۔ وفاقی وزیرسرفراز بگٹی آکھیے مختلف شہراں اچ ہولڈنگ سینٹرز بݨا ݙتن ، غیر قانونی غیر ملکیاں کوں اتھاں رکھیا ویسی ۔ انہاں کوں اتھاں ساریاں سہولتاں ݙتیاں ویسن ۔ بے دخلی متعلق پالیسی صرف غیر قانونی غیر ملکیاں کیتے ہے جنہاں کنے کوئی سفری دستاویز کائنی ، جنہاں کنے ملک اچ قیام دا کوئی جواز کائنی ، انہاں کوں جیل نہ بھیڄا ویسی ، انہاں کیتے ہولڈنگ سینٹرز بݨا ݙتے ڳئن جتھوں انہاں کوں انہاں دے ملک بھیڄ ݙتا ویسی ۔ انہاں آکھیے ملک توں بے دخل کیتے ونڄݨ آلے 50 ہزار روپے نقد کرنسی توں ودھ کیش دی صورت اچ  ساݙے ملک توں نی گھن تے ونڄ سڳدے ، بینکنگ چینلز یا ٻئے ذرائع توں منتقلی سانڳے پالیسی بݨائی ویندی پئی اے جیڑھی جو ھک ݙو ݙینھ اچ طے تھی ویسی ۔ انہاں آکھیے غیر ملکیاں کوں ملک اچ رہݨ اچ غیر قانونی سہولت ݙیوݨ آلے پاکستانیاں دے خلاف قانون دے مطابق سخت کارروائی کیتی ویسی ، غیر ملکیاں دے غیر قانونی شناختی کارڈ بݨاوݨ آلیں دے خلاف وی کارروائی کیتی ویسی ۔ انہاں آکھیے میݙی غیر قانونی رہݨ آلے غیر ملکیاں توں اپیل اے جو حالی رضاکارانہ واپسی دا رستہ یکم نومبر تئیں موجود اے ، او ایندا فیدہ چاون بجائے ایندے جو اساں انہاں دے خلاف سختی کروں، ریاست کنے پوری معلومات ہن جو غیر قانونی شہری کتھاں کتھاں رہندے پئن ، اے ھک ٻہوں وݙا تے چیلنجنگ ٹاسک اے جیں تے اساں یکم نومبر دے بعد عمل درآمد کریسوں ۔رضا کارانہ واپسی دی حوصلہ افزائی کریندے پیوں ، جیڑھے رضاکارانہ واپس ویندے پئن انہاں کتیے مشکلات گھٹ ہوسن اساں انہاں کوں سہولتاں ݙیندے پیوں ، انہاں کوں تکلیف نی ݙتی ویندی پئی ایں سلسلے اچ اساں متعلقہ ملکاں نال وی رابطے اچ ہیسے تے تاں جو جنہاں شہریاں کوں اساں واپس بھیجیسوں انہاں کیتے مشکلات ہوسن ۔انہاں آکھیے ہولڈنگ سینٹرز متعلق سارے صوبیں نال ڳالھ تھی ڳئی اے ، صوبے ایں سلسلے اچ مالی تے انتظامی اقدامات کریندے پئن ۔غیر ملکیاں کوں جاری کیتے ڳئے شناختی کارڈ متعلق سوال تے انہاں آکھیے جو ایں سانڳے نادرا اچ جرنیل کوں لاتا ڳئے تاں جو سکیورٹی اتے ٹیکنالوجی متعلق تجربے کوں کٹھا کرتے فیدہ چاتا ونڄے ، نادرا قومی سلامتی دا ھک ادارہ بݨ ڳئے، ایں سلسلے اچ ڈی این اے سودھے سارے اقدامات آندے کجھ مہینے اچ کیتے ویسن ۔

LEAVE A REPLY

Please enter your comment!
Please enter your name here